Vawiin hian Serchhip DC Meeting Hall ah District Level Task Force on Covid19 leh Serchhip khawpui chhunga VLTF aiawhte chu Bawrhsap Pu Kumar Abhishek, IAS hovin an thukhawm a, kum kal meka Covid19 donaa hmalakna hrang hrangte thlir letin, kan hma lawka Christmas leh kumthar lo thleng tura hma lak dan tur an rel.

Chairman Pu Kumar Abhishek chuan, kum tir lam atanga Covid19 kan dona kawnga theih tawp chhuaha hnathawktu zawng zawngte, Health Department leh Volunteer te, Police Department te, Village Level Task Force te, tlawmngaipawl leh kohhran te, Executive Duty zawng zawngte  leh mimal inpe tak takte chungah lawmthu a sawi a. An thawhrimna zarah hripui lakah vawiin thlengin thlamuang takin mipuite kan awm a ni, a ti.  Bawrhsap hian, India ram hmun dangte kan thlirin hun pui laiin he natna hi a darh hluai thin tih a chiang viau mai a, hei vang hian kan hma lawka Christmas leh kumthar lo thleng turah hian Covid19 laka himna dan te khauh zawka kan kenkawha, mipuite pawhin fimkhur lehzuala kan hun kan hman a tul hle dawn a. Kan zavaiin a mawhphurtu theuh kan ni tih hre chunga dan kan zawm a tul a ni, tiin thawktute chu khauh zawka engkim kalpui tur leh mipuite chu dan zawm tha turin a chah a ni. Pu Kumar Abhishek chuan, thingtlang khaw hrang hrangte chu an khuaa haw duhte lo khap lo tur te, Covid free Certificate lo phut lo turtein a chah nawn a, Mizoram chhunga awm sate Mizoram chhunga an chet vel chu khapna engmah a awm lova, State pawn atanga lo haw te erawh chu kim takin khung hrang zel an ni, tih a tarlang a. Mitin te Christmas leh kumthar hlim tak leh him taka hmang vek turin duhsakna a hlan a ni.

Addl. SP Pu PC Laltanpuia, MPS pawhin thusawiin, hunpui chhungin Police te theih tawp chhuahin an duty leh dawn tih a tarlanga. Khawtin leh vengtina VLTF leh tlawmngaipawlte chu thawhpuiah sawmin, mipuite chu sawrkar thupek hrang hrangte tha taka zawm theuh turin a ngen bawk.

Dr. Laldawngliana Sailo, CMO pawhin thusawiin, tun hnaiah Covid19 vaccine sawi rik a ni nasa ta hle mai a, chanchin lawmawm tak a ni. Amaherawh chu Vaccine awm mai tawh tura beisei vanga lo inthlah dul erawh thil tih chi a ni lova, kan fimkhur ngaia kan fimkhur reng a tul zawk a ni, a ti a.  Vaccine a lo chhuak a nih pawhin a dawng hmasatu turte ruahman fel vek tawh a ni a, mipui nawlpuiin kan hmuh theih hun leh mi zawng zawng mamawh khawp kan neih theih hun kha a la hla hle thei a ni. Chuvang chuan, Social Distancing, Kut Sil leh Mask te hi thil pawimawh hmasa a la ni reng tiin mipuite fimkhur turin a chah a ni.

Meeting hian hun pui lo thleng tur chhunga hmalakna tur pawimawh nia an hriat hrang hrangte an sawi ho a ni.

He hunah hian Pu R. Sathiyasundaram, IPS, SP, Pu Lalmuansanga Ralte, MCS, Addl. DC leh member dangte an tel a ni.