No.6924/2020-2021

Champhai khawpui thianghlim, mawi leh hrisel siam tura hmalatu Clean, Beautiful and Healthy Champhai Town Committee chu an Adviser Dr.Z.R. Thiamsanga MLA, Health & Family Welfare Board Vice Chairman hovin vawiin khan Champhai DC Conference Hall-ah an thukhawm.  

He hun kaihruaitu Dr.Z.R. Thiamsanga chuan Clean, Beautiful and Healthy Champhai Town chu Champhai Master Plan puahchah mek nena kalkawp tur niin, Champhai North leh Champhai South bial vawngtu MLA te inthuruala thahnemngai taka kalpui mek zel a ni a, kan zavaia tangrualin Champhai thar siam kan tum dawn a ni, a ti a. Faina, hriselna leh mawina kawnga District level anga hmalak tawhna hrang hrangteah Champhai khawpui bialtu MLA pahnihte thinlung taka an lawm thu a sawi a. Tunhnaia Hospital fai inelna Kayakalp puan takah   District Hospital Champhaiin fai ber pahnihna a hauh leh NHM Programme hnuaia inelna hrang hrangah CMO Champhai kaltlanga lawmman chi hrang hrang 22 lak a ni chu  lawmawm tiin, thawktute chhuanawm a tih thu a sawi a. Kum tharah sawrkarin khaw hrisel ber lawmman siam a tum thu sawiin, BSc Nursing thutchilh  Health and  Wellness Centre engemawzat siam anih thu leh Sub Centre awmlohna khuaah Health Clinic buatsaiha Health Worker-te dah ani  chuan Covid-19 karah hriselna kawnga hmasawn nan theihtawp chhuah chhunzawm reng anih tih a tarlang  a ni, a ti bawk.

H&FW Board Vice Chairman Mizorama Covid-19 hri kai tam tak awm zinga vanduaia natna dang behbawm neih vanga thi mi tlemte an awm chu a tuarpui thu sawiin, a tam zawk an dam chhuak thin chu Pathian venna vang a ni, a ti a. Covid-19 hrileng laka tun thlenga tuarna nasa zawk a thleng lo chu   Pathian venna leh sawrkar khaipa ber Chief Minister, Health Minister, hotu dangte leh kan zavai inkara thawhhona tha tak  awmzia tarlangtu anih thu a sawi a. Nakum January thla chhoah Covid-19 Vaccine pawh neih hman beisei anih thu sawiin, vaccine dawng hmasa turte thehlut tura tih an nih tawh thu leh Covid-19 dona kawnga ral hmatawnga dingte ngaipawihmawh hmasak phawt an nih tur thu a sawi a. Kan hma lawk hunpui Krismas leh Kumthar lo thleng turah mipuite fimkhur lehzual tura chahin, puipunna leh a huhova hun hmanna ang chite siam lo turin a chah a. Champhai khawpui thianghlim, mawi leh hrisel siam tura theihtawp  chhuahpuiah Champhai mipuite a sawm bawk a ni.

Champhai Bawrhsap Pi Maria C.T Zuali chuan faina kawngah Champhai district-in hmuh theiha hma a sawn thu sawiin, faina hapta hman atangin tang tlang taka faina kawnga hmalak anih thu a sawi a. Clean, Beautiful and Healthy Champhai Town dinna tur kawngah Sub Committee pathum Clean, Healthy leh Beauty Sub Committee-te dinfel tawh niin member-te pawh ruat fel an ni, a ti a. Bawlhlawh sakhat lakkhawm, paih, sawngbawl leh hnawmhnawk siam leh paihna lova paihte hremna dan Solid Waste Management Bye Laws, 2020 hman tan tawh anih thu a sawi bawk.

Thukhawm chuan Champhai khawpui chhung mawi leh en hahdam siam turin rualkhai zawka rawng hman tha a ti a, rawng hman tlanglawn ber ni turin rawng var thlan a ni a, rawng dangte nena  hman pawlh pawh phal nise tih a ni a, inchung atan bik erawh rawng sen leh hringte hman nise tih a ni.  Meeting hmasa October Ni 1, 2020 a neihin a lo rel tawh angin Sub Divisional Magistrate/SDO Sadar kaihhruaiin Road Protection Squad din anih thu leh kawngpui nek zawnga hmalate endika hriattirna pek thin an nih thu tarlan  a ni bawk.  He hunah hian Sub-Committee peng hrang hrang 3 te atangin hmalak tawh dan leh ruahmanna neihte ngaihthlak a ni a. Heng bakah hian District Environment Plan buatsaih chu bihchian a ni a. Health Clinics Awareness Campaign tam zawk neihte, Zirna inah fai inzirtirna leh ruihhlo laka fihlim tura inzirtirna  buatsaihte, mipui tana awlsam taka kawngpui kan mai theihna tur bik  Zebra Crossing siam dan turte enfiah nise tih a ni bawk.