759/2023-2024

Lunglei the 10^th June, 2023 – Lunglei khawpui chhunga hmasawnna ruhrel pawimawh tak sak mek pahnih Kendriya Vidyalaya School, Lunglei leh Lunglei Market & Trade Centre te chu vawiin chawhnu khan Commerce & Industries Minister Dr R. Lalthangliana chuan a tlawh a ni. Minister hi Lunglei SP Pu Rahul Alwal, Additional DC Pu Donny Lalruatsanga leh official dangte bakah khawtlang hruaitu leh party hruaituten an tawiawm a ni.

Kendriya Vidyalaya School (KVS), Lunglei ah hian Principal (IC) Pu jitendra Kumar Meena leh MAMCO JE Pu ST Lalthanzauva ten lo dawngsawngin hna kal mek dinhmun te leh hmachhap hrang hrangte chipchiar takin an sawihova. Dr R. Lalthangliana chuan Kendriya Vidyalaya School (KVS) chu India ram pum huap pawha zirna in tha leh hmingthang anih thu sawiin zirlai tam zawk an in enroll thuai theihnan project chu uluk taka lo thawk chhunzawm tur leh a hun ngeia zawhfel anih theihnan hma la tlang turin a chah a ni.

Tun dinhmunah KVS, Lungleiah hian Class I atang Class X thleng awmin zirlai 250 an awm a, zirtirtu regular 14 leh contract 4 bakah non-teaching staff  6 an awm a. Kendriya Vidyalya School, Lunglei tih changtlun hna hi Sawrkar laipui Ministry of Human Resource Development kaltlangin kum 2018 khan Cheng nuai 2385.37 (Cheng nuai sanghnih zathum sawmriat panga singthum leh sangsarih) ruahman niin Mizoram Agriculture Marketing Corporation (MAMCO) te chuan he hna hi an thawk meka. MAMCO JE Pu ST Lalthanzauva’n report alo pek danin hnathawh hi tluang taka kal mek zelin tun dinhmunah hna za zela sawmkua (90%) thawh zawh anih tawh thu leh rokhawlhna dang a awmlo anih chuan kumin August thla ah zawhfel hman beisei a ni a. He project hian school building, Staff Quarter (Type 2, 3, 5), canteen, guard room-te bakah developmental work hrang hrang – retaining wall, kawng siam, plumbing, electrification etc te a keng tel a ni. Hna thawh zawh anih hnu hian zirlai 1500 vel leng tura beisei anih thu KVS hotute chuan an report a ni.

Lunglei Market & Trade Centre tur hi NEC sum cheng nuai 1403.40 senga sak mek a ni a.  He market-ah hian a zavaiin stall 339, motor 30 lenna car parking, 2 wheeler 71 lenna parking, police beat post, market office, toilet 34 te bakah godown, bawlhhlawh dah khawmna leh adt awm tura ruahman a ni. Contractor hi Pu Lalzothanga Maubawk, Aizawl niin, chhawng li a sak tur niin 25.08.2024 a zawh hman tura ruahman a ni.

Lunglei Market & Trade Centre sakna hmun ah hian PWD Lunglei Building Project Division Er Malsawmdawngliani leh a thawhpuiten Minister hi anlo dawngsawng a, hna kal mek dinhmun leh hmachhawpte an sawiho a ni. C&I Minister chuan Lunglei Market & Trade Centre chu Lunglei District tana hmasawnnna ruhrel pawimawh berte zing ami, Lunglei economy tana pawimawh tak la ni zel tur anih angin a bul tanna atanga uluk leh fimkhur taka hna kalpui tur leh material tha tak zel hmang turin PWD Engineer-te leh contractor te a chah a. Harsatna an neihte a hnenah thlen thuai thin turin a chah bawk a ni.