Vawiin khan Lawngtlai District chhim lam ramri, Zorinpui hmuna India leh Myanmar insumdawn tawnna hmunpui Land Custom Station (LCS) sakna tur hmun chu Commerce & Industries (C&I) Minister Dr R. Lalthangliana chuan tlawhin, hma lak dan tur a en fiah.

Minister hi Aizawl atangin C&I Development Board Vice Chairman Pu C. Ramhluna, C&I Secretary Pu P. Jawahar leh C&I Department hotu dangte'n an tawiawm a. Lawngtlai atangin Bawrhsap Dr Andrew H. Vanlaldika, LADC-a Chief Executive Member Pu Manghmung Chinzah leh EM leh MDC te bakah, LADC leh state sawrkar hnuaia official eng emaw zatin an tawiawm bawk a. Ramria kawng siam hna thawktu Engineering Projects of India Ltd (EPIL) hotute'n lo dawngsawngin, India leh Myanmar insumdawn tawn nana hma lakna kal mekte sawi hovin, a dinhmun an thlir ho a ni.

Zorinpuia LCS hmun atana Mizoram sawrkar C&I Department-in ram bigha 67.32-a zau a lo neih fel tawh chu kawng kal dan tur tihdanglam a nih leh deuh avangin sut (cancel) niin, hemi atan hian a tharin ram bigha 85 (11.3850 hectare)-a zau chu Lai Autonomous District Council (LADC) chuan Mizoram sawrkarah a pe leh a. Vawiin hian LADC ai awhin Executive Member i/c Revenue Pu Hre Kung chuan Minister Dr R. Lalthangliana kutah Land Lease copy hi a hlan nghal a ni.

Zorinpuia Land Custom Station sakna tur hian Rs vaibelchhe 54 (Rs 54 crore) hu Detailed Project Report (DPR) chu NBCC (consultant) chuan siamin, sawrkar laipuiah theh luh tawh a ni a. Hemi puitlin theih hma atan Zorinpuiah hian Temporary Immigration Check Post chu rei lo teah kalpui tan tum niin, a hmunhma pawh en fel tawh a ni.

C&I Minister Dr R. Lalthangliana chuan ram hmasawn nan ram dang nena insumdawn tawnna chu thil pawimawh tak a nih thu sawiin, Remna Thuthlung (Memorandum of Settlement)-a chuang a nih avangin international border-a sumdawnna hmun din chu sawrkarin a ngai pawimawh hle tih a sawi a. Commerce & Industries hnuaiah Myanmar leh Bangladesh nena ramri hmun hrang hrangah ram dang nena insumdawn tawnna tur hmunpui (border trade centre) changtlung tak din turin chak takin hma lak chhoh mek a ni a; Zorinpui, Saisihchhuah, Hruitezawl, Kawrpuichhuah, Silsury, Thingsai leh Zokhawthar-ah te border trade hmun atan hma lakna kalpui mek a nih bakah, hmun hrang hrangah border haat din turin ruahmanna pawh siam chhoh mek a ni, a ti a. India sawrkar ai awhte'n an sawi danin, Kawrpuichhuaha trade centre phei chu kum 2023 August thla velah chuan kalpui tan (commission) hman a nih beisei a ni, a ti.

Insumdawn tawnna tichangtlung tur chuan inkal pawhna kawngpui neih that a pawimawh avangin kawng pawh sial chhoh mek a ni tih sawiin, Dr R. Lalthangliana chuan project lian ber Kaladan Multi-Modal Transit Transport Project (KMMTTP) kawngpui sial mek pawh Lawngtlai atanga Zorinpui thleng chu thawh zawh thawkhat tawh niin, Zorinpui atanga Paletwa pawh tur pawh chak taka thawh chhoh mek a ni, a ti a. KMMTTP bakah hian Saisihchhuah kal tlanga Myanmar nena insumdawn tawnna kawngpui sialna tur sum pawh chhuak tawhin, a thawktu tur 74 BRTF pawhin thui tak ruahmanna an nei tawh tih sawiin, Lawngtlai District chuan ram dang nena insumdawn tawnna tur luhka a neih that avangin District vannei tak nia a hriat thu a sawi.  

Minister chuan hmasawnna hna tawh hrang hrangte COVID-19 hri leng vangin sukuk deuh mah se, boruak a ziaawm chhoh deuh tawh avangin hmasawnna hna hrang hrang pawh chak zawka thawh chhunzawm theih a nih a beisei thu a sawi a. COVID-19 hri leng dona kawngah Mizoram chu India rama thawk tha ber niin, vanduaithlak takin nunna chan mi 10 kan nei nachungin, state dangte nena khaikhin chuan dinhmun duhawm takah kan ding a ni tiin, hlawhtling taka hri leng dona kawnga theih tawp chhuaha an insawr chhuahnaah Lawngtlai District mipuite chungah lawm thu a sawi nghal a ni.

Ramria sumdawnna hmunpui dinna kawngah mimal hnena zangnadawmna pek ngai awm thin chu hna tisawt lotu leh thil buaithlak tak a nih thin thu sawiin, Minister chuan zangnadawmna pek ngai lo tura Zorinpui LCS hmun tur atan LADC-in Mizoram sawrkara ram a pe chu sawrkar ai awhin lawm thu a sawi a. Hei hi a hlawhtlin hunah a chhawr ber tur chu Lawngtlai District a nih thu a sawi.

Minister hian Zorinpuia LCS hmun tur a en bakah hian, Myanmar ram chhunga Paletwa thleng pawh tur kawngpui sial mek chu km 4 thleng zawhin, a en nghal a. Hna thawktute chu an hna thawh chin leh harsatna an tawhte sawipuiin, a hma thei ang ber leh a tha thei ang bera hna chu thawh zawh tum turin a chah a ni.

LADC Revenue Department-in Mizoram sawrkar Commerce & Industries Department hnena Land Custom Station hmun tur an pek hi Zochachhuah ram chhung, Myanmar ramri lui bul, KMMTTP kawngpui bul a ni a. Land lease (ram luah phalna) hi kum 99 chhung atan niin, a grade hi Grade B a ni a. A ram zau zawng hi bigha 85 (hectare 11.3850) a ni.

Myanmar nena insumdawn tawnna KMMTTP kawngpui chhunzawmna, India ram chhung Zorinpui atanga Myanmar ram chhung Paletwa thleng hi 2-lane-in km 109.200 sial tur a ni a. A hna hi Ministry of External Affairs enkawlna hnuaiah Engineering Projects (India) Ltd leh C&C Construction Ltd te'n thawk mekin, he kawng hian Myanmar ram chhunga khaw 24 a tan tlang dawn a. A kawng sei zawng pumpui km 109.200 atangin a hmun sam fai tawh km 95, a ruangam (design) ruahman tawh km 45, lei laih (formation cutting) tawh chin km 38 leh lirtheiin a zawh theih tura subgrade phah tawh km 14.860 a awm a ni.