Nimin chawhnu khan Commerce & Industries Minister Pu H.Rohluna chuan sawrkar hmalakna  kalmek hmun thumah a tlawh a. Heng te hi - Aizawl New Market chhunga  hmalakna kal mek pahnih - NEC  atanga sum hmuh Rs 13 Crore senga sak mek New Market Building Phase-I  leh hun reilote hnuah thawh tan mai tur, NEDP kaltlanga Rs 36.519 Crore senga sak tur  Aizawl  City Centre Annexe -I  te bakah Zuangtui Industrial Estate hmunhma thawmthat hna,  Ministry of Commerce & Industries atanga sum hmuh Rs 18.25 Crore senga siam mek Modified Industrial Infrastructure Upgradation Scheme(MIIUS)  Project te an ni a. Heng hmun pawimawh endiknaah hian Commerce & Industries Minister Pu H.Rohluna chu  Commerce & Industries Director  Pu J.Hmingthanmawia leh official dang ten an tawiawm a ni.  

Commerce & Industries Minister Pu H.Rohluna New Market Building Phase-I   hi a tlawhchhuak vekin a sakdan te a endik a. Chawhmeh zawrhdan thianghlim zawka kalpui a tul dan te sawiin dawrkai te pawn thianghlimna an ngaih pawimawh beisei a ni a ti a. Building tharah chuan chawhmeh zuar zingah an thil zawrhlai te a buka hralh theih te chu Digital Weighting Scale hmang tura phut a ni ang a ti.  Pu H.Rohluna chuan Bazar  chhunga mipui veivakte himna tura ruahmanna te siam a tul thu contractor te hi a hrilh bawk  a ni.  New Market Building Phase-I   hi chhawng sarih a sang a ni a, a chhunga dawr nghak tur te dawr awmdan azirin dawr kaw tin te hi siam rem mek a ni a, dawr awm zat tur chiang taka hriat theih ni lo mahse, sumdawng 500 chuang an lut thei tura beisei a ni. New Market Building Phase-I  hi hawn theih thuai beisei niin a sak hna thawktu Pu Michael C.Lalmuanpuia, Director, Lushai Engineers chuan  New Market Building Phase-I   sakna tur sum Rs 13 Crore atangin Rs 450 Lakh chiah an la dawng chungin mipui tan a pawimawh tih hriain  sum puk tur dap chawpin an sa zo thawkhat tawh a hun rei vakloah chuan mipui hman theihin sak zawh hman an tum tih a sawi a ni. 

New Market Building Phase - I endik a nih hnu hian Commerce & Industries Minister Pu H.Rohluna leh official te chuan tuna Aizawl New Market hmuna Aizawl City Centre Annexe - I (ACCA-I) sakdan tur  a sakna tur hmunhma Foreign Lane-ah an endik leh a. Hetah hian mimal then khat ten Bazar huam chhung an nek tih hmuh a ni a, a rang lama hmalak chhunzawm dan tur sawiho a ni. ACCA-I satu tur hi tunah hian Restricted Tender chhuahin thlan mek a ni a, contractor thlan fel veleh a sak hna tan a ni dawn a ni. ACCA-I a tlawhnaah Pu H.Rohluna chuan New Market huam chhunga sawrkarin hmasawnna ruhrel a din tum te chu kum 30, 40 hnulam thleng ngaihtuah lawkna leh thangthar ten an chhunzawm zel rema duan a ni a ti. 

Zuangtui Industrial Esatate thawmthat hna, MIIUS Project chhunga a hlawm lian ber kawngpui KM 4.5 a thui Double Lane a zauh leh siam that hna chu thawh zawh tep tawh a ni a, project peng tesep dang  pawh thawh chhunzawm a ni dawn a ni. MIIUS Project chungchangah Commerce & Industries Minister Pu H.Rohluna chuan thu sawiin, “Kan thalai te entrepreneurship-ah an harh mek a, thil lawmawm tak a ni. Chuvangin vawiina kan Industrial Estate hmunhma te kan lo puahchah lawk hian awm zia thui tak a nei dawn a. Tuna, Industrial Estate chhunga awm te pawh hian an awmchhan anga tan an lak sauh sauh a ngai dawn a. Sawrkar duhsakna changa an hmuhma te sawrkar sum hmanga tihchangtlun a ni hi state danga Industrial Area-ah a thleng ngai lo va. Anni chuan an thawhchhuah sum intum tawmin an hmunhma te an develop thin zawk a ni”, tiin Estate luah mek ten tan lak loh chuan tan la thei tam tak hmunhma mamawh an awm mek tih a sawi a ni.