Tuirial A/C Constituency Bialtu MLA Pu Hmingdailova Khiangte chuan vawiin khan Lungdai Community Hall ah Mizoram State Rural Livelihoods Mission (MzSRLM) hnuaia Self Help Group (SHG) ten pawisak puk tur an dawnna ‘Credit Camp’ a hmanpui.

‘Credit Camp’ hi DRDA Kolasib leh Mizoram Rural Bank(MRB) te hmalakna hnuaia pek chhuah ani a, Lungdai Brach MRB huam chhunga Bank Account nei SHG 23 te chuan cheng nuai 5 theuh MRB atangin an puk dawn a, vawiin hian cash credit limit loan cheng nuai 1 theuh pek chhuah phawt an ni.

He huna Khuallian Pu Hmingdailova Khiangte chuan SHG ten an mahni mamawhna zawna an hman tur pawisa an puk thei chu a lawmpui thu a sawi a, heng an sum puk te hi a lo thlawna ti riral mai lovin awmze nei taka peipun angai ani a ti a, hlawkpui thama ti peipung tur chuan thawhrimna, taihmakna leh rinawmna a pawimawh ani tiin SHG te chu theihtawp chhuah turin a chah a, a rulhna kawngah pawh rinawmna chhawmnung zel turin a chah bawk a ni. Rim taka hnathawk peiloa ei hmuh tum tein Ram an tichhe thin a ni tiin, taimakna chu kan intih hmuh zual sauh sauh angai ani a ti a, SHG ina a tum ang ngeiin SHG sum puk, sum che vel leh an thawhchhuah te chu chhungkaw hmasawn nan leh chhungkaw tih changtlun nana hmang turin he huna kalkhawm SHG member te chu a fuih a ni. 

He hun hi Pu Lalnunhlua, District Mission Director/Project Director DRDA,Kolasib in a kaihruai a, ‘Credit Camp’ hi Kolasib District ah hmun 6 a hman tura duan ani a, Nilaini kalta khan kawnpui ah hman tawh niin July ni 23 ah vairengte a hman ani anga, August ni 7 ah Buhchangphai, August 21 ah Kolasib leh August 31 ah Saipuma hman tur ani.