Vawiin chawhma khan Lunglei Town Sanitation Task Force chu an Chairman Lunglei DC Dr Ankita Chakravarty kaihhruaiin a office chamber-ah an thukhawm. UD&PA Department buatsaih ‘Mizoram Khawpui Fai Inelna-2018’ atana Lunglei District inpuahchah dan tur leh Cleanliness Week – 2018 hman dan tur an rel. Meeting-ah hian a kaihhnawih sawrkar department hrang hrang hotute, tlawmngai pawl aiawhte leh khawtlang hruaitute an tel a ni.

Meeting-ah hian kum kaltaa Lunglei Town Sanitation Task Force hmalakna hrang hrang thlirletna leh sawihona neih niin ‘Mizoram Khawpui Fai Inelna-2018’ atana Lunglei District inpuahchah dan tur chipchiar taka sawiho a ni a. He hun kaihruaitu Dr Ankita Chakravarty chuan UD&PA Department-in ‘Mizoram Khawpui Fai Inelna-2018’ a buatsaih tur thu sawiin, chu intihsiaknaa dinhmun tha taka Lunglei District a din theih nana ruahmanna neih puiah kalkhawmte a sawm a. District Capital fai ber kan nih theihna atana hmalakna tur pawimawh leh inbuatsaihna tur chhawpchhuah te a taka puitlin ngei tura thawhpuiah Lunglei mipuite a sawm nghal a. Faina kawngah mitin ten mawhphurna kan nei theuh a ni tiin Lunglei DC chuan kan in leh lo, kan chheh vel kan tihfai mai bakah kan rilru sukthlek faina lamah kan her rem a ngai a ni, a ti.

Lunglei DUDO Pu Andrew Lahruaia chuan ‘Mizoram Khawpui Fai Inelna-2017’-a Village Council-te, YMA, Clean Lunglei leh Lunglei mipuite thawhrimna leh inpekna chu fakawm a tih thu sawiin an chungah lawmthu a sawi a. Kumin khawpui Fai Inelna kan hmachhawn mekah pawh Lunglei mipui thahnem tak phur taka an rawn thawhchhuah leh ngei a beisei thu a tarlang bawk.

Vawiina kalkhawmte hian UD&PA in khawpui fai a tehna tur chi hrang hrangte sawihona leh hmalak dan tur rawtnate an siam a, heng ruahmanna hrang hrang an chhawpchhuahte hi a theih chin chinah hmalak zui nghal tur a ni bawk ang. Heng te zingah veng tihfai hnatlang, banner siam, mumal taka bawlhhlawh sawngbawl dan (solid waste manangement), tuiluankawr tihfai leh bawlhhlawh bawm siam te veng hrang hrangah kalpui thuai a ni ang. Task Force hian khawpui chhunga thingpun kawngah nasa taka hmalak ni se tih a rel a. Rahsiveng Thlanmual, Venglai Thlanmual, Childrens Park leh Tarmita Khawthlir-ah te thing phun tura ruahmanna siam a ni ang.

Cleanliness Week- 2018 hman dan tur pawh sawiho niin category hrang hrangah – Veng, School, sawrkar office leh hospital-ah te  Faina intihsiakna neih le a ni ang. Hemi bakah hian zirlaite tan Essay Writing Competition, painting competition, leh Slogan Writing Competition te buatsaih a ni dawn bawk.   

Mizoram Khawpui Fai Inelna-ah hian ranking mumal taka siam a ni a, kum khat lo liam hnua inelna neih leh hma chu he faina ranking hi a ding reng dawn a, khawpui fai-te ranking a ni reng dawn a ni. Kum tin he inelna neih thin tura ruahman hi, a kum leha India ram pumpui khaw fai inelna ‘Swachh Suvekshan’ neih thin atana Mizoram khawpuite inruahmanna tha tak a nih pawh beisei a ni a. Chu mai bakah Mizoram mipuite, a bikin khawpuia chengte, faina lama hma an sawn zel theihna atan leh an lo changkan zel theihna atana rah tha a chhuah ngei Mizoram sorkar chuan a beisei a ni.