Asia chhimchhak ram sawm inthlunzawmna, Association of South East Asian Nations (ASEAN) te leh India aiawhte nena kum tin intawhkhawmna buatsaih thin Delhi Dialogue chu nimin atang khan New Delhi-a The Oberoi Hotel-ah a vawi 10 na neih niin, vawiin thleng a awh a. Delhi Dialogue hawnna ah India hmarchhak state Chief Minister-ten thu an sawi theuh a. Mizoram Chief Minister Pu Lal Thanhawla pawhin he hunah hian Mizoram leh India hmarchhak state ten hmasawnna chak zawk an neih theihna tura tul leh mamawh a tih te a thlen a ni. 

Chief Minister chuan Act East Policy chu ASEAN ramte nena inkungkaihna siamin hmarchhak state te sum leh pai leh ei leh bar a an dinhmun nasa taka a vawrh chhoh theih thu sawiin, hei hian a leilung hausaknate awmze neiin a hman tangkai tir thei a ni, a ti a.Chumi atan chuan ASEAN ramte nen tui leh khawmuala inkalpawhna tha tak neih a tul thu sawiin, kumin Delhi Dialogue thupui “Strengthening India- ASEAN Maritime Cooperation” nen pawh a inhmeh hle a ti a ni. Chief Minister chuan Ministry of External Affairs hmalakna in Act East Policy hnuaia Kaladan Multi Modal Transit Transport Project chu India hmarchhak ah tluang taka hmalak mek zel a nih thu te, Mizoram sawkar chuan a thawh ve tur chinah 76% a zawh tawh thu leh, Lei dawh tur pariat zinga pali chu thal a lo thlen a thawk nghal thuai turin ruahmanna siam a nih thu te a sawi bawk. India leh Myanmar inrina tho Zokhawthar a Land Customs Station chu a enkawltute thuamthat kawngah sawrkar laipuiin chak zawka hma a lak pawimawh a tih thu Pu Lal Thanhawla chuan Delhi Dialogue ah hian a thlen a. Helai hmun panna kawng zauh leh siamthat hna hi World Bank in hna a la thawh mek thu a sawi bawk. Bangladesh nena Mizoram inrina lamah chuan Kawrpuichhuah Integrated Check Post (ICP) chu hawn a la nih loh thu leh Land Port Authority of India chuan chak zawka hmala tura a beisei thu te a sawi tel bawk. 

Kaladan Multi Modal Transit Transport Project hnuaiah hian Mizoram PWD chu 87.18 kms a thui Lawngtlai atanga Zorinpui thleng kawng siam tur a ni a. KMMT Project hi a vawi chuan 893.18 km a thui niin, Mizoram PWD khawih tur bawk te chu Zorinpui atanga Kaletwa (48.30 km), Kaletwa atanga Paletwa (60.70 km), Paletwa atanga Sittwe (158 km) leh Sittwe atanga Kolkata Port tui kawng (539 kms) te an ni. Tunah hian Guwahati kaltlanga Aizawl atanga Kolkata kawng thui zawng hi 1489 kms a ni a, KMMTTP hian 421 kms in khawpui pahnih inkar hi a pawt tawi sawt dawn a ni. 

Delhi Dialogue Special plenary session kaihruaitu Minister of State for External Affairs, Gen V K Singh chuan kumin thupui thlanchhuah chuan India leh ASEAN ramte thawhhona chak zawk a thlen phah ngei a beisei thu a sawi a. India sawrkarin India hmarchhak state-te a ngaihpawimawh thu sawiin, Act East policy chu Look East Policy atanga hmasawnna satliah mai a nih loh thu te, huam zau zawkin, rah tha hmu ngei tura ngawrh zawka hnathawh a ni, a ti a. Chu mi atan chuan North east state-te chu Asia chhimchhak ramte nen inlaichinna tha tak siam kawnga sawrkar laipui tana thawhpui pawimawh tak an nih thu a sawi a. External Affairs Minister Sushma Swaraj hovin Ministerial Session neih chhunzawm a ni.