No.4190/2021-2022
Aizawl, 7th March 2022 :Vawiin khan Indian Institute of Packaging (IIP), Kolkata Centre; Ministry of Commerce and Industry, Government of India leh Commerce and Industries Department, Mizoram te buatsaih ‘Packaging for Export of Agri food, handloom & handicraft products of Mizoram’ hawnna inkhawm Aijal Club-a neih chu Commerce & Industries Secretary Pi Esther Lal Ruatkimi’n a hmanpui.

Pi Esther Lal Ruatkimi chuan kan thilsiam chhuah te him nan, vawn that nan leh man man zawka hralh a nih theih nana tuam leh funmawi (packaging) pawimawhzia a sawi a. Mizoram chhunga thil siam chhuah leh thar chhuah kan neih hrang hrang te hi State dang leh ram danga thawnchhuak turin tha tak leh mawi taka fun (pack) a ngai a, tun dinhmunah packaging industry hi Mizoram pumah pakhat mah kan la nei rih lo, tiin hemi kawnga ngaihtuahna thar seng turin thalaite a chah a ni. Commerce and Industries Secretary chuan packaging hi ni khat thil thua zir thiam theih a ni lo a, kumpui lingleta zir ngai a nih laiin ni khat awh training programme buatsaih chu entreprenuers te kaih harh nan leh a pawimawhzia inhrilhriatna atan hman a ni, a ti a. He programme in a tum bulpui ber chu Mizoram chhunga thil siam chhuah, thawn chhuah tlak te reng reng tualchhung bazar chauh ni lo, State dang leh ram dang thleng pawha hralhchhuah dan ngaihtuah a ni, a ti a. Entreprenuers kalkhawmte fuihin an thilsiam te thawnchhuak tura hma la ngei tur leh sawrkar pawhin puih a huam thu te, packaging-ah tanpui an ngai a nih chuan IIP mithiamten tanpui an inhuam reng thu te a sawi a ni.

He ni khat awh training-ah hian Mizoram chhunga entreprenuers engemawzat an kalkhawm a. IIP Director Dr Tanweer Alam chuan kalkhawmte lawmna thu a sawi a. Mizoram Food Processing Agency (MIFPA) General Manager Pu Zosangliana pawhin thu a sawi a ni.

Vawiin nileng training neih niin Dr Bidhan Das, Deputy Director & Branch Head, IIP, Kolkata Centre bakah Guwahati, leh Kolkata atanga mithiam lo kal ten subject hrang hrangah zirtirna an pe dawn a ni.

Attachment

  • Loading attachment...