Sawrkar Laipui in Bharat Nirman/Flagship Programme kaltlanga thinglang hmasawn nana a duan programme leh scheme hrang hrang mipui hnena puanzarna leh hrilhhriatna - Public Information Campaign (PIC) chu vawiin khan Kanghmun Government Middle Sikul- ah neih a ni a, Mizoram Information Commission a Chief Information Commissioner Pu Lal Dingliana IFS (Rtd) in a hawng.
Pu Lal Dingliana chuan Sorkar Laipui in ram hmasawn nan leh mi chanhai zawk te tana programme hrang hrang a duan leh hma a lak mek mipuite hnenah, a kalhmang hrilhhriat a tul leh a pawimawh thu a sawi. Mizoram Sorkar pawhin mipuite chawikanna tur hmalakna pawimawh tak tak a kalpui mek a ni tiin eng ang programme tha pawh Sorkarin duang mahse a hlawtlinna leh a hlawhchhamna chu mipuite ko ah innghah thu a sawi.
RTI chungchang sawiin Pu Lal Dingliana chuan RTI Act chu mipuiten Sorkar hnathawh dan an hriat duh leh an hriat theihna atana Sorkar Laipui in he Dan hi a siam thu a sawi. RTI Act chu langtlang Sorkar a awm theih nan leh corruption dal theihna hmanrau pawimawh tak a ni a ti bawk.
CIC hian Directorate of Field Publicity leh All India Radio (AIR) Aizawl Station in Photo Exhibition an buatsaih a tlawh bakah PIC peng khat atan Presbyterian Hospital in NRHM kaltlanga Health Camp an buatsaih chu a tlawh bawk a ni.
Vawiina PIC hawnna inkhawm hi Pu Zosangzuala, IBPS Member PIC Core Committee in kaihruaia, Pu Mangjangam Touthang, IIS Chairman PIC Core Committee chuan inlawmna thu a sawi. He PIC hi Press Information Bureau New Delhi a Director Pu Mayank Agarwal in a hmanpui bawk a. Kanghmun VCP Pu K Vanlalfala pawhin thu asawi bawk a ni. Chawhnu lamah Technical Session I leh II chu Pu H Lalramliana Editor ‘Mamit Times’ Mamit leh Pu R Lalmuanpuia Editor ‘Zotlang Lentu’ te chuan an kaihruaia a. He Technical Session-ah hian Sawrkar laipui Scheme leh Programme hrang hrang - PMGSY, RGGVY, MGNREGA, SSA MSM, IAY leh a adang te a kaihhnawih Department hrang hranga mithiamten mipui kalkhawm te hnenah an sawifiah bakah mipui lam atanga zawhna an chang nghal bawk a ni.
