2080/2022-2023
Aizawl, the 27th October 2022: Vawiin khan Mizoram Information Commission office-ah a thawh thumna atan public authorities 10 (sawm) RTI Act, 2005 Section 4(1)(b) zawm chungchang sawiho turin Pu Lalnunmawia Chuaungo, Chief Information Commissioner leh Pu Zorammawia, Information Commissioner, Mizoram Information Commission te hmaah koh an ni a. Naktuk ni 28.09.2022 hian department 10 (sawm) dang pawh sawihona nei tura koh an ni bawk.

RTI Act, 2005 Section 4(1)(b) in a phut angin sawrkar department te chu an website-ah RTI hmanga dil ngai lova pholan theih - DAA leh SPIO te biak pawh theihna contact, department directory, scheme leh programme hrang hrang department in a kalpui te, act/rules/regulations hrang hrang department in a tihchhuah te, department hnuaia beneficiary list te, department budget dawn dan leh mipui tana tangkai tur information te dah tura tih a ni a. Hei hi department tam takin an tihlawhtling tan a, la ti fel lo tlem azawng an la awm mek bawk a ni.

RTI Act, 2005 Section 4(1)(b) chuan Public Authority/sorkar department-te chu an hnathawhna chungchang mipuiin awlsam zawka an hriat theihna turin point 17 (sawmpasarih) tarlangin an office website-ah dah ngei tura tih an ni. Hemi bawhzui nan hian Mizoram Information Commission (MIC) chuan 19.01.2022 khan order tichhuakin sorkar office hrang hrang a Departmental Appellate Authority (DAA) leh State Public Information Officer (SPIO) te chu RTI Act, 2005 Section 4(1)(b) in a phut angin Suo Motu disclosure ti vek tur leh 28.02.2022 aia tlai lovah an hmalakna te Secretary, MIC hnena thehlut turin a lo hriattir tawh a ni.

Head of Department leh SPIO te chu RTI Act Section 4(1)(b) in a phut angin mipuiin zawh kher ngai lova an department hmalakna leh an hnathawh chungchang an website ah dahchhuak ngei tura hriattir an ni. Harsatna an neih pawhin inthlahrung lova Mizoram Information Commission be rawn turin an chah bawk. An website-ah an dah ngei em tih Mizoram Information Commission chuan a endik zui zel dawn tih hriattir an ni bawk a ni. Hetih lai hian an hmalakna te tha taka tarlang department engemaw zat an awm tih hriat a ni a, Mizoram Information Commission chuan an chungah lawmthu a sawi a ni.

Hemi hma hian Public Authorities 21 (sawmhnih pakhat) te chu an website-ah Suo Motu Disclosure an tih that tawk loh avangin Mizoram Information Commission chuan April leh May thla a lo ko tawh a ni.