Vawiin khan CIJW School, Counter Insurgency and Jungle Warfare School Vairengte chuan an din champha vawi 43-na ropui takin an lawm a. He school din tirha an Commandant hmasa ber Lt. General Mathew Thomas, PVSM, AVSM, VSM, Founding Father chuan khuallian nia hmanpuiin CIJW School chu India rama sipai training na hmun ropui khawvel sipai tha ber ber chher chhuak tawhtu a ni, a ti.

General Mathew Thomas chuan Remna tha tak siam tura Mizoram mipui leh Mizoram sawrkar inpekna chu fakawm a tih thu a sawi a. Kum 43 liam taa an bul tan dan sawiin Mizoram mipuite, a bik takin Vairengte mipuite leh sipaite inkarah vawiin ni thlengin boruak duhawm tak vawn nun chhoh a ni hi ka ngai hlu takzet a ni, a ti. CIJW school chu India ram venhimna kawnga sipai training na hmun tha, khawvela Sipai tha ber ber chher chhuaktu a nih avangin a chhuanawm a. School Motto 'Fight the Guerilla like a Guerilla' tih chu a taka vawnnun a ni, General Mathew chuan a ti bawk a ni.

CIJW School Raising day hmanpuitu dang Brigadier AK Ram, CIJW School Commandant hlui chuan CIJW school chu a chhuanawm avangin India ram chhunga Institution lar berte zingah dah a ni a. India ram mai nilo khawvela trainingna hmun langsar a niin magazine lar India Today phei chuan 'India's Finest' tia kovin India ram khalhtu ti hialin a ziak a ni, a ti.

General Rajeshwar, Commandant ni mek chuan CIJW School chu kum 43 a din tawh chhungin India ram tan a thawh hlawk hle a. Ral beih leh Remna leh Muanna ram chhungah a bik takin Hmar chhak ram chhunga thlentir kawngah sulhnu a ngah hle a ni, a ti bawk.

CIJW School hi kum 1967 khan Jungle Training School tia a hming vuahin Jowai, Jaintia Hills, Meghalaya-ah din a ni a. Kum 1970 May 1 khan a hming hi thlakin Vairengte, Mizoramah sawn a ni a. Heta tang hian tuna a hming CIJW School tih hi a pu ta a ni.