Sorkar laipuia Department of Electronics & Information Technology (DeitY), Ministry of Communications & Information Technology , National Association of Software & Services Company (NASSCOM) leh Mizoram Sorkara Department of Information & Communications Technology (ICT) tangkawpin vawiin khan Aijal Club-ah ‘Citizen Centric e-Government State Consultation Workshop’ neih a ni a, ICT Minister Pu Zodintluanga chu Khuallian a ni. He Workshop-ah hian sorkar laipui atangin mi pawimawh engemawzat an lo tel a, chung zingah chuan Dr. Rajendra Kumar, Jt. Secretary, DeitY leh Pu V. Sivasubramaniam, Director, DietY te pawh an tel a ni.

Workshop hawngtu ICT Minister Pu Zodintluanga chuan sorkar laipuiin hmarchhak biala information technology tih chakna tur leh zau zawka hman a nih theih nana chak taka hma a lak mekna chu lawmawm a tih thu a sawi a. Sorkarin a ngaihpawimawh em em ‘e-governance’ tum ber chu mipui mimir ten sorkar pisa hrang hrang dawra kal kual ngai lova hmun pakhat atanga awlsam taka an mamawh phuhruk theih a ni a, hemi atan hian Mizoramah ngei pawh Common Service Centres (CSC) engemawzat din tawh niin District leh Block tinah pawh din belh zel a nih tur thu a sawi. Tun atanga reiloteah Mizoram University Campus chhungah Software Technology Park din tur thu te, kumin chhung ngeiah State Data Centre changtlung tak peihfel a nih tur thu te tarlangin Minister chuan heng bakah hian e-District Centre te, chhiah pekna tur (Commercial Taxes MMPs) te leh Crime & Criminal Tracking Networking System te pawh Mizoram sorkar chuan ruahman thuai a tum a ni, a ti. e-Governance hlawhtlin nana pawimawh ber internet connectivity chu duhthusam lo deuh thin mahse internet hmanga Mizoram pum tuam tur Mizoram State Wide Area Network (MSWAN) chu naktukah hawn a nih tur thu a tarlang a. Kumin chhung hian PGCIL chuan Aizawl thlenga optic fibre connection an rawn tihfel ngei a beisei thu a sawi bawk.

DietY Jt. Secretary Dr. Rajendra Kumar chuan sorkar laipuiin rampum huapa kum 2006 May thlaa e-Governance Plan a chhawpchhuah tan chuan sorkar, sumdawnna leh mipui te kalphung leh nunphung a khawih danglam dan turte a sawifiah a. Sorkarin mipuite laka a tihtur leh a rawngbawl sakna kawng hrang hrang te awlsam leh tlawm zawka mipuiten an dawn theihna tura ruahman a ni, a ti a. Kumin chhung hian e-Governance chuan rampum a tuam kim thawkhat tura beisei a nih thu a sawi bawk. Rampumah CSC nuai 1 din tum a ni a, hei hian khaw 6,00,000 a thlunzawm dawn a ni. Tun dinhmunah chuan CSC 98,319 din a ni tawh a, chung zinga 73, 235 te chu internet connectivity pek a ni tawh nghe nghe a ni. Sorkar chuan National e-Governance Plan (NeGP) kaltlangin mipuite tan service chi hrang hrang 270 chhawpchhuah sak a tum a ni. e-Governance atana pawimawh thil pali - State Data Centre (SDC), State Wide Area Network (SWAN), State Service Delivery Gateway (SSDG) leh Common Service Centres (CSC) nei kim vek tawh state awmchhun chu Manipur chiah a la nih thu a tarlang bawk.

ICT Principal Secretary Dr. S.S.Garbyal chuan Mizoram-a e-Governance kalpui a nih dan tlangpui a sawi a. Mizoram-a e-Governance kenkawhnaa thuneitu sang ber - State e-Governance Council, Chief Minister Chairman-na hnuaiah leh, Chief Secretary Chairman-na hnuaiah State e-Governance Apex Committee te din a ni tawh a. Anni hnuaiah hian State e-Governance Mission Team (SeMT) leh Project e-Governance Mission Team (PeMT) te an thawk dawn thung a ni. Mizoram-a SWAN hmalatu chu ZENICS niin tunah hian Point of Presence (PoP) 42 din a ni tawh a, heng zinga 26 chu hnathawk thei nghala siam an ni tawh a ni. State Data Centre atan cheng vaibelchhe 30.88 chu phalsak niin December, 2012-ah peihfel tum a nih thu Pu Garbyal hian tarlang bawk.

Sorkar Laipui chuan kum 2013-2014 chhunga rampumah optic fibre hmanga internet thlunzawmna turin cheng vaibelchhe 10,000 a ruahman a ni. Rampum huap tur Electronic Delivery of Services Bill pawh tunah hian Parliament-ah putluh a ni tawh a. State zawng zawngte chu kum 2012-2013 chhunga e-Governance Annual Action Plan siam tura hriattir an nih vek bakah, e-Governance hlawhtling taka kalpui a nih theih nan hnathawktute training pek te, mipuite tan counter a theih anga tam siam leh Rules mumal tak siam turin sorkar laipui chuan thu a pe nghe nghe a ni.

Mizoram bikah chuan Mizoram Citizen Service (e-Governance) Rules chu 10th September, 2010 khan pawm a ni tawh a. Common Service Centre pawh Mizoram hmun hrang hrangah 136 lai buatsaih a ni a, heng zinga 89 chu internet connectivity pek ni tawhin hna an thawk tan tawh a ni. Heng CSC kaltlangin G2C (Government to Citizen) service 10 lai pek mek a ni a, B2C (Business to Citizen) services (entir nan : air/railway ticket lak, mobile bill pek, etc) 70 lai Mizoramah hian mipuite tan awlsam taka tih theih a ni tawh bawk a ni.