Nimin khan Mizoram State Transport Authority te chu an Chairman, Transport Secretary Pu K. Lalnghingova, IAS hovin an thukhawm a, Mizoram chhunga khualzin phur lirthei chi hrang hrang chuan man te thlirin Aizawl City Bus-ah te chuan passenger zawng zawngin ticket hmangin bus chuang tawh se tih an rel. He rawtna hi sorkarah thlenin hun reilote hnuah hman theih pawh beisei a ni.

Rawtna ang chuan City Bus te hian ticket Rs.10, Rs.5, Rs.2 leh Re.1 man an nei vek tawh ang a, chungte chu passenger te hnenah conductor ten an pe ngei ngei tur a ni ang a. Ticket nei lova bus chuan leh ticket hralh chhuak duh lo conductor te chu dan anga hrem theih an ni tawh ang a, Rs.500/- thleng chawitir theih an ni ang. Hei hian bus-a veivak thin te phunnawina pakhat pawisa kir kim loh tih leh bus neitute leh conductor te inkara inrintawnna a siam beisei a ni. Hei bakah hian taxi, maxicab leh bus permit hralh chhawn leh zawrh mai thin te a awm tawh loh nan permit neitu hming thlak a nih dawnin, motor lei hnuah chauh thlak theih a ni dawn a. Sorkar hnathawk dan kalha taxi, maxicab leh bus neite pawh dan anga thil tih a nih theih nan July thla ral hmaa MSTA-a inhriattir vek tura thupek an ni. MST deluxe bus-a chuan man, kilometre khata Re.1 ni mek chu pawisa 95-ah tihhniam a ni ang a; medium bus-a chuan man, kilometre 1-a pawisa 80 pawh 75p. ah tihhniam a ni ang. Amaherawhchu Air Condition Deluxe-a chuan man chu tihpun hret a, chuan nuam zawk leh manhla zawka siam a ni thung ang. Sorkar laipui duh danin bungraw phur chi motor liante Composite Fee, kum khata Rs.3,000 ni thin pawh Rs.5,000 a ni tawh dawn bawk a; hei hi ram puma state tam zawka an rate hman a ni. MSTA chuan Aizawl City Bus chuan man tihhniam chu thuphungin a remti tawh a. Mahse hemi chungchanga sawi duh neite tana hun hawn a la tawp loh avangin, a tihhniam dan tur erawh chu hun tiam a tawp hnua la tihfel a ni ang.