287/2022-2023
Aizawl, 26th April, 2022 : Tun hnaia Print & Electronic Media bakah Social Media lama sawi hlawh tak pakhat Civil Hospital Aizawl a hman lai CT Scan chhiat chungchangah hetiang hian Health Department chuan thuchhuah a siam.

Tuna Civil Hospital Aizawl-in a hman thin GE Company siam CT Scan (16 slices) hi 16th August, 2013 khan NEC atanga sum hmuh hmanga bun niin kum 8 chhung zet hman a lo ni tawh a. Rim taka hman a nih avangin repair pawh a ngai fo a ni. Tichuan, CT Scan hi 10th November, 2021 (9:00 PM) khan a chhia tih hriat a ni ta a. A khawl chhiat chhan hi Hardware lamah defect a awm a; a rim em avang a ni ber. Khawl hlui tawh tak a nih avangin repair chi a ni tawh lo va. Repair bakah Annual Maintenance senso turte chhutin enkawlzui hi tih chi a ni tawh lo a ni. Tichuan, company lam nen inremsiamin de-commission a, lei let (buy back) mai turin thutlukna siam a ni a. Khawl pawh hi 22nd – 24th February inkar chhung khan thiah darh niin GE Company lamin an la fel zui nghal bawk.

Tichuan, Department hotu liante pawhin a theih anga hma la nghalin CT Scan neih theihna turin proposal pawh a rang thei ang berin siam nghal a ni. Tichuan, Siemens Company siam CT Scan thar tha zawk (64 slices) chu Rs.2,60,00,000/- in lei a ni ta a. Khawl hi October ni 13, 2021 khan a bungraw thenkhat lo thleng hmasain hemi hnu October ni 20, 2021 khan bungraw dang a lo thlen belh bawk a ni.

Amaherawhchu, CT Scan khawl thar hi chuti maia Installation tih nghal theih a ni lova. Atomic Regulatory Board (AERB) thupek leh duhdan ang veka kal ngai a ni. Khawl thar bun tur chuan CT Scan thar dahna room tur pawh hi nasa taka renovate a ngaih bakah Company duhdan ang thlapa UPS Room (Battery room), electrification, earthing, AC fittings leh accessories-te pawh tih ngai vek a ni a. Hei hian hun a duh rei hle. Hemi atan hian department chuan theih ang tawkin hma a la chho ta char char a. Tunah hian Civil Works peih fel vek a ni tawh. Installation leh panel board test charge ti turin 29th April, 2022 hian Kolkatta atangin Company aiawhte pawh lo kal tura tih fel an ni tawh bawk.

Mizoram sawrkar chuan mipui ten CT Scan khawl an mamawhna hi hriain theih tawp a chhuah reng a. Tin, Department pawhin rang taka peih fel hi a duhdan a nih mai bakah tha thlah awm lovin CT Scan thar nei tur hian theih tawp a chhuah reng a ni. Mipuite pawh, he harsatna hi hrethiam turin kan ngen tak meuh a. CT Scan thar nei tur hian Mizoram sawrkar chuan inthlahdah lovin theih tawp a chhuah a ni tih hi min hriatpui kan duh a ni.