286/2022-2023
Aizawl, the 26th April 2022: State Institute of Rural Development & Panchayati Raj (SIRD&PR), Mizoram hnuaia hnathawktu hrang hrangte leh SLMC & IAC hnuaia thawkte tan ni 4 (26 – 29.4.2022) chhung awh tur Faculty Development and Capacity Building of Officers and Staff under SIRD&PR, ETCs, SPRC, DPRCs and SLMC & IAC chu vawiin ni 26.4.2022 khan SIRD&PR, Durtlang Leitan-ah Pu R. Zarzosanga, Secretary, Rural Development Department chuan a hawng.

Pu R. Zarzosanga chuan Rural Development Department, Mizoram hmalakna hrang hrang te a tarlang a. MGNREGS-ah tunah hian Mizoram-ah Job Card 2,08,816 a awm mek a, hna chi hrang hrang 23,408 thawh a niin chung zinga hna 18,721 chu leilung humhalh hna niin, 14,601 chu chhungkaw malin an chhawr tangkai theih hna te a ni a ti a.

Kum kal ta khan Thingtlang in sak tanpuina 5511 pek an ni a. Dawng thei tura in ziak lut mi 25,539 an awm bawk a ni. LAD nen intawmin Panchayat Bhavan pawh khaw 5 ah sak mek a ni a ti a. Tunah hian SRLM hmalakna in SHG 8199 din tawh a ni a ti bawk.

Rural Development Department chu Department huam zau tak a nih thu a sawi a. Heng hmalakna zingah hian SEDP hnuaiah Suspension Bridge 8 siam tawh a ni a, heta tan hian Rs. 217.2 lakhs sen a ni a ti. PMKSY Version 2.0 ah Project 18 atan DPR buatsaih mek a ni a, Rs. 702.45 lakhs zet Central share tur pawh dawn tawh a ni a ti.

RD Secretary chuan midangte zirtirtu turin hetianga hmasawn zelna tur atana intuaitharna neih a ni thin hi a lawmawm hle a ni, a ti a. Kan ruahmanna siam te a hlawhtlin theih nan mahni zawn theuhah nasa zawka tan kan lak zel a ngaih thu sawiin, tluang tak leh hlawk taka hmang tura duhsakna hlanin, training hi a hawng a ni.

He Training-ah hian SIRD&PR, Durtlang Leitan; ETC 3 – Pukpui, Lunglei, Thingsulthliah leh Kolasib; DPRC 5 – Mamit, Serchhip, Champhai, Siaha leh Lawngtlai leh SLMC&IAC, Durtlang Leitan atangin thawktute an tel a ni.

Training chhung hian PFMS, TMP bakah Office Administration leh Sawrkar hnathawkte hriat tura pawimawh hrang hrangte zirho a ni ang a, RGSA Training Calendar, 2022-23 siam a ni bawk ang.

Training hawnna hunah hian Dr. Margaret Lalbiakthangi, Course Director/Sr. Core Faculty, SIRD&PR chuan training neih dan tur tlangpui leh an zir turte sawiin, Dr. M.S. Dawngliani, Associate Professor, SIRD&PR chuan lawmthu sawiin training hawnna hun hi a khar a ni.