285/2022-2023
Dated Champhai, the 26th April, 2022: Mizoram sawrkar flagship programme Socio-Economic Development Policy (SEDP) kalpuina kawnga District Level-a thuneitu sang ber District Level Committee on SEDP Champhai District thutkhawm hmasa ber chu vawiin chawhma dar 11 khan District Bawrhsap leh Chairman ni bawk Pu James Lalrinchhana hovin DC Conference Hall-ah neih a ni.

Bawrhsap Pu James Lalrinchhana chuan SEDP chu sawrkar flagship programme pawimawh leh ngaihpawimawh tak a nih avangin a hlawhtlin theih nan theihtawp chhuaha hmalak a ngaih thu a sawi a. District Level Committee on SEDP chu District puma thuneitu sang ber leh mawhphurhna pawimawh tak chelha kengkawhtu a nih avangin mipui rawngbawl leh sawrkar hmalaknate a nih dan tur anga kalpui kawngah theihtawp chuahtu tur a ni, a ti a. District dangte aia hnufual bik lo leh hmahruaitu ni zawk thei tura tanlakpuiah member kalkhawmte chu sawmin, inpawhtlang leh infinchhuah chung zela thawhhona tha tak vawngnung zel turin a chah a. District mipuite hmasawn nana fawng chelhtute kan nih avangin inpekna nen ngaihtuahhna tam zawk kan sen a tul dawn a ni, a ti bawk.

SEDP Nodal Officer, Champhai District Pu Lalnunfela Chawngthu, SDO Sadar chuan Village Level SEDP Committee kalphung leh awmziate a sawifiah a. Sawrkarin ruahmanna felfai tak siamin SEDP a kalpui mek thu sawiin, sawrkar duhdan angin hamthatna dawngtuten hlawhtlinna hmel an hmuh ngei theih nana puih leh finchhuah kawngah theihtawp chhuaha tanho tlan thiam a tul thu a sawi bawk.

State sawrkar atanga lehkha dawnin District Level Committee on SEDP te tun thla chhunga veng/khua tina SEDP dawng tur zirchianga rawtna siamtu tur, Village Level SEDP Committee din vek tura a tih bawhzuiin Champhai North AC, Champhai South AC leh East Tuipui AC huam chhunga veng/khua hrang hrang atanga rawtna lutte chu ngun taka zirho a nih hnuah pawm a ni a. Thukhawm chuan SEDP hnuaia thlan theih trade hrang hrangte inkhuangrual taka pek a nih theih nan leh ram leilung, sik leh sa mila kalpui a nih theih nan a tul ang zelin mithiam zawkte rawn chunga hmalak tha a ti a. Tihsual palh theihte venthawn thuhlaah Line department-te chu hamthatna dawng tur kimchang an neih veleh Nodal Officer hnenah list kimchang thawn tura tih an ni a. List kimchang nei tawhten tunkar chhungin thehlut vek se tih a ni bawk.

He hunah hian member-te inhmelhriattirna neih a nih hnuin District Level Committee on SEDP nihphung leh hnathawh dan tur kalhmangte Pi Esther Leihang, SDC hnen atangin ngaihthlak a ni a. Line Department hrang hrangte hmalak tawhna, hmachhawp leh inpuahchah lawkna neih dan tlangpui department hotute hnen atanga ngaihthlak a ni bawk a. Member kalkhawmte atangin hriatfiah duh leh ngaimawh zawngte sawina hun hawn niin inpawhtlang taka hun hman ho a ni.

Tun dinhmuna SEDP hnuaia hmalak tawhna hrang hrang tarlan zingah Agriculture Department kaltlangin Vaimim ching tura thlan chhungkua Champhai North bialah 264, Champhai South-ah 300 leh East Tuipuiah 450, an vaiin chhungkua 1,014 te hnenah vaimim chi kg 20 theuha sem chhuah tawh a ni a. Vaimim chin zawh hnu hian bekang ching leh tura ruahmanna neih a ni. Heng bakah hian Fu huan siam tur chhungkua Champhai North bialah 9, Champhai South-ah 78 leh East Tuipuiah 11, an vaiin mi 98 te thlan tawh an ni a, leilet siam (WRC) chhungkua 462, Champhai North bialah 116, Champhai South-ah 204 leh East Tuipuiah 142 te thlan an ni tawh bawk a, leilet buh bakah thlasikah Chana ching tuma ruahmanna siam a ni bawk.

Vety Department hnuaiah Rainbow Rooster Layer Farming chhungkua 6 leh Broiler farming hnuaiah chhungkua 37, an vaiin 43 te hnenah SEDP kaltlangin first leh second installment pek tawh a ni a, third installment pawh pek chhuah mai theih tura buaipui a ni. Horticulture Department hnuaiah SEDP 2019-2020 kaltlangin Ngur khuaa chhungkua 20 leh Mualkawia chhungkua 20, an vaiin chhungkua 40 te Sapthei chintir niin a rah pawh seng chhoh mek a ni a, SEDP 2020-2021 chhungin a enkawlna leh mamawh angte buaipuina tur tanpuina pek chhuah an ni bawk. Samthang Block Office cheng nuai 15 senga sak luah luh tawh a ni a. Department kaltlang hian Rua ching tura hmalak chhoh mek zel a ni a, Champhai North bialah chhungkua 50, Champhai South-ah 75 leh East Tuipuiah 75, an vaiin chhungkua 200 te thlan niin inzirtirna kalpui thin a ni. UD&PA kaltlangin khawpui cheithatna leh hmasawnna ruhrel hrang hrangte siam a ni bawk a. Heng bakah hian line department-te hnen atangin inpuahchah lawkna leh hmachhawpte ngaihthlak a ni bawk.