284/2022-2023
Kolasib 26th April 2022: Vawiin chawhma khan KVK Complex, Vengthar, Kolasibah DC Office, Kolasib, KVK leh ATMA tangkawpin India zalenna kum 75-na pual a ‘Azadi ka Amrit Mahotsav’ hmanna kal zel ah loneitute tan ‘Campaign on Kisan Baghidari Prathmika Hamari’ an buatsaih a. He hun ah hian loneitute tan Kisan Mela leh Department hrang hrang hnuai a hmathatna awm inzirtirna hun an nei a ni.

He hun hi Dr. Michelle C.Lallawmkimi, Senior Scientist & Head, KVK Kolasibin kaihruaiin Pu John LT Sanga, Deputy Commissioner chu khuallian a ni a. ATMA, Kolasiba mithiamten loneitute leh ran vulhtute rawn theih turin Animal & Plant Health Clinic an kalpui a, Thingdawl Farmers’ Society, Vau SHG, Bilkhawthlir, Kolasib Nursery, KVK & ATMA, Kolasib leh Kawnpui Women’s Farmer Club-ten an thil thar chhuahte an pho chhuak bawk a ni.

Pu John LT Sanga, Deputy Commissioner chuan India ram hausakna chu loneitute kut ah hun rei tak ata innghat tawh a nih thu sawiin Sawrkar laipui pawhin a ngaih pawimawh zia lantir nan India zalenna kum 75-na lawmna kal zel ah loneitute tan ‘Campaign on Kisan Baghidari Prathmika Hamari’ buatsaih a nih thu a tarlang a. Loneitute leh kuthnathawktute hmasawnna chuan ram hmasawnna a thlen thin thu sawiin Niti Aayog tehna hnuai a Grade ‘A’ ni pha KVK, Kolasib chu tangkai tak a chhawr thiam turin kalkhawmte chu a chah bawk a ni. DC chuan Kolasib district chu lo leh huan siam nana ram thleng rem tak leh boruak nuam tak a nih thu sawiin hetih rual hian ram leilung hausakna tichereu zawnga hmalakna chuan sik leh sa inthlakthleng dan thui taka a nghawng thin thu a tarlang a. KVK, ATMA leh Department danga mithiamte rawn chunga leilung hausakna tichhe lo zawnga hmalakna kalpui uar zel turin leh ‘Campaign on Kisan Baghidari Prathmika Hamari’ chu hlawhtling tak a kalpui turin duhsakna a hlan bawk a ni.

Kisan Mela hawnna hun hman zawh hian Technical session neih leh a ni a. Dr. Carolyn Zothansiami, Subject Matter Specialist (Soil Science) leh Pu Rambuatsaiha, Project Director hnen atangin zirtirna ngaihthlak a ni a. Sawrkar hnuaia loneitute tan a hamthatna awm hrang hrangte inhrilhhriatna hun neih a ni bawk.