Florence Nightingale Piancham May ni 12 chu khawvel pumah 'International Nurses day" atan hman a nih thin angin, Hemi lawmna hun atana inbuatsaihna leh midangte tana inpekna hun hmasa atan Vawiin May ni 8th, 2014 (Ningani) khan Civil Hospital, Aizawl thawktu ten New Secretariat leh a chhehvel Office hrang hrangte fangin a mamawhtute tan a thlawnin Blood Sugar (Random) test, BP Check leh taksa rih zawng bukin hun an hmanpui a. Office hnathawktute leh Office Dawrtu mi tam tak te an lawm hle.

He huna hian mi zali (400) chuang lai Aizawl Civil Hospital Nurse te hian an en hman a ni. Office hnathawktute hnen atanga thudawn danin Pisa kai te zingah hian hna lama tul tak tak, inentirna hun pawh nei mumal lo te an nih lai karah hetianga Aizawl Civil Hospital Thawktuten an thawhna hmuna kal chilha hun an rawn hmanpui thei chu lawmawm an tih thu an sawi.

Aizawl Civil Hospital Nurse te hian hun remchang hmasa berah Tawngtai Bethel Camping Centre, Chawnpui vengah Buhfai, chawhmeh leh thawmhnaw te pe in hun an hmang leh dawn a ni.

May ni 12 hian "International Nurses Day" lawmna runpui hi Trained Nurse Asociation of India, Mizoram Branch te huaihawtin Aizawl Civil Hospital Gynaecology Building tharah thupui : "Nurses: A force for change, A Vital resource for Health" a hmangin ropui taka neih a ni ang.