830/2025-2026

 Aizawl the 11 June,2025:  Sinlung Hills  Council (SHC) Headquarters Office Complex, Sakawrdaiah Green Mizoram day 2025 puala  function leh thing phunna hun hman a ni. He hun hi Pu R Lalfakzuala, SHC  Chairman chuan khuallian niin a hmanpui a, Kan tu leh fate an dam khawchhuah theih nan thing phun belh zel hi a țul a ni a ti.

Green Mizoram day pual function tawi hi Pu N Lalzarzova, SDO(C), Sakawrdai chuan a kaihruai a, kal khawmte lawmna thu a sawi bakah Green Mizoram Day 2025 thupui ang taka tuihna siam ṭhatna atana thing phun belh zel a ṭul thu leh mipui nawlpuiin huan leh lo enkawlnaah kan mamawh bak ram ti kang lo tura ṭan lak a ṭul thu te a sawi a. Pu PC Lalțanpuia, DFO Darlawn chuan report pein Nikum Green Mizoram Day pualin Darlawn Forest Division huam chhungah Thing tiak 435 phun a nih thu leh 12919 zet sem chhuah a nih thu a sawi. Tin, Thing phun leh kangmei ven chu inkawp rem taka a kal zel a ngaih thu sawiin kumin chhungin Darlawn Forest Division chhunga khuate Kangmei ven kawnga ti țha leh entawntlak tak tak an awm thu tar langin an division chhunga N Serzawl  khua chuan Aizawl district chhunga kangmei veng țha lawmman 1 na lain Lungsum khua chuan lawmman 3 na an la a, Darlawn Forest Division chhunga khua tho NE Tlangnuam khua chuan Saitual District chhunga kangmei vengțha lawmman 1 na lain Vanbawng khua chuan lawmman 2 na an la bawk.

He hunah hian Hon'ble Chief Minister in Mizoram State tree Herhse phun uar a duh angin Herhse țiak 20 bakah thing dang chi hrang hrang 50,  a vaiin thing țiak 70 an phun a ni a, Ramngaw leh nungcha hmuhalh chungchang inzirtirna hun hman a ni bawk a, Khuallian bakah mi engemaw zatin Rawmngaw leh nungcha humhalh tura intiamin hming an sign bawk.