2874/2022-2023

Aizawl  30th  November 2022: Vawiin khan School Education Minister Pu Lalchhandama Ralte chuan MBSE Conference Hall, Chaltlang-ah MBSE buatsaih Pawl-10 Science leh Mathematics Zirlaibu Mizo tawnga ziak a tlangzarh a. Pu JH Zoremthanga, MBSE Chairman in kaihruaiin; Dr.Lalzirmawia Chhangte IAS, School Education Department Secretary chu Khualzahawm a ni.

Khuallian Pu Lalchhandama Ralte chuan beiseina sang tak leh nghakhlel taka thlir Class-10 Science leh Mathematics zirlaibu Mizo tawnga a chhuak chu lawmawm a tih thu a sawi a. Mizo zirlai tam takin Science leh Mathematics an huphurh thin bik nachhan chu tawng an hriatthiam tawk loh vang niin, a nihna bulthum an man tawk loh vang a ni a ti a. Mizo tawnga chhawpchhuah a ni chu zirlai tam tak ten subject 2-te chu an ngam sawt anga, tlangnel sawtin, an tui phah dawn a ni a ti. Minister chuan hmasawnna hnukpui chu Science leh Mathematics ah a innghat lian em em a, ram changkang leh lehkhathiam ram ten an ngaih pawihmawh tak subject a ni tiin Mizo tawng zirlaibu chu naupangte hriatthiamna tak tak neih tir tu a ni ngei dawn tih a sawi.

Minister chuan thu a sawi zelnaah MBSE-a thawkte inpekna ropui a ti a. Tunah Mizo version chiah chhuak thei rih mahse Mizo leh English Bu (Bilingual Textbook) chu nakum Academic Session-ah a chhuah hman a nih tur thu a sawi. Mizoram ah hian zirlai huang (Syllabus) te hi a te bik lo a, Quality Education-ah a zahpuiawm lo hle a ni a ti. Inchawimawi leh inlawmpuina kawngah Mizo te harh a hun tawh tih sawiin Khuallian Pu Lalchhandama Ralte chuan MBSE kaihhruaina hnuaiah Mizoram chu 2020 atangin Covid hripui karah offline in a hun takah exam tha taka buatsaih thei an ni a, Kohhran, NGOs, Local council leh Mizo mipuite thawhhona rah a ni a ti. Minister chuan kalkhawmte chu Mizo hnam chawisanna kawngah leh tawng humna kawngah tan la chhunzawm zel turin a fuih a. Hnam tana mellung pawimawh tak phochhuah a nih rual hian thangthar te ngaituahna thar leh fim tak nena kaihhruaina kawngah thawkho zel turin kalkhawmte a chah bawk a ni.

Khualzawhawm Dr. Lalzirmawia Chhangte, IAS School Education Secretary pawhin thusawiin Mizo tawnga lehlin kawnga inpe leh mithiamte zarah ram tan hmasawnna ropui tak a ni a ti a. NEP-2020 in a ngaihpawih em em pianpui tawng a zir theih tur lehkhabu a chhuak chu hnam tan rotling a ni a ti. Mizo tawng bu hian Zirlaite a sawt zawng leh tangkaipui tur zawng a chhawpchhuah sak dawn bakah Mizo tawng tih hausakna a ni tiin Hnam leh tawng hi kalkawp tlat a nih avangin hnam humhim nan pawh he zirlaibu hi a pawimawh hle a ni a ti. Vawiina lehkhabu tlangzarh inkhawm-ah hian Khualzahawm hian lehkhabu lehlinna kawnga bultumtu mi 40-te hnenah thuziak (citation) a hlan nghal a ni.

He tlangzarna inkhawmah hian MBSE Secretary Pi Sarah Lalengzami Pachuau hnen atangin report ngaihthlak a ni a. MBSE Director (Academic) Pu R Lalthlamuana’n lawmthu sawiin hun a khar a ni.

National Education Policy, 2020 chuan 'multilingualism' (tawng chi hrang hrang thiam) hi a ngai pawimawh em em a. Zirlai naupang ten Science leh Mathematics subjects-te an mahni tawng (mother tongue) ngeia an zir hian hriatthiamna tak tak an paw chhuak zawk tura ngaih a ni. Hei hi Mizoram lama hotute pawhin tha tiin, an ngai pawimawh hle a. Hemi bawhzui hian Mizoram Board of School Education chuan Bilingual Sub-Committee on Secondary Science and Mathematics chu ni 05.05.2022 khan a din a. Mizoram-a Science eh Mathematics zirtirtu thiam leh tha tak tak te he Sub-Committee member atan hian ruat an ni. Hma pawh chak taka lak nghal niin, MBSE Officer-te leh SubCommittee member ten workshop vawi-40 lai neiin bilingual textbook hi buatsaih a ni a. Tunah hian Pawl 10 Mathematics leh Science Mizo version chu Mizoram school tina hman theih turin peih alo ni ta a ni. Mizo version bik chauh chhuah lailawk a nih chhan chu HSLC Examination, 2023 atan a zirlaiten an hman tangkai hman ngei duhsakna avanga tih a ni a. Academic session thar atang chuan bilingual textbook hi secondary stage ah hman theih ngei turin hmalak mek a ni. MBSE hi India ramah Board of Secondary Education, Andhra Pradesh tih loh ah chuan a bawhzui hmasa pawl leh tihlawhtling hmasa ber an ni thei a ni.