Champhai khawpui thianghlim, mawi leh hrisel zawk siam kawnga hmalatu tur a din Champhai Town Clean, Beautiful and Healthy Committee thurel bawhzuiin vawiin khan khawpui huamchhunga veng leh khaw faite endik dan tur rel a ni.

Pu K.Lalhmuakliana, DUDO Champhai hova I&PR Conference Hall, CHANEM-a thukhawm chuan Champhai khawpui huamchhunga Village Council hrang hrang 18 te tuamchhuakin thla thum dan zelah faina, hriselna leh khawpui cheimawi kawnga hmalakna endik thin nise a ti a. January-March thla chhung bika endik hna chu March Ni 16-20 chhunga kalpui nise tiin a rel a. Endik tura ruatte chu group 4 ah then darhin veng hlawm hrang hranga siam 4 te an endik ang a, a tithate lawmman pek a ni dawn a ni. He hunah hian endikna tur atana tehfungte zirchiana sawiho anih hnuah siam that ngai leh belh ngaite tihfel a ni a. VC tinte hnenah hriattirna lehkha leh endikna atana tehfung turte hrilhfiahna leh zawhna chhan turte siama pek theuh nise tih a ni bawk a. Endikna atanga hmuhchhuahte chu District Bawrhsap Office-ah thehluh thin tur niin, a tul anga Champhai khawpui bialtu MLA te hnenah thlen thin tur a ni ang.