Aizawl District AIDS Prevention and Control Committee in a lo rel tawh angin Aizawl khawpui chhunga sawrkar office hrang hrangah HIV/AIDS sensitization campaign neih mek a ni a. Vawiin khan Tourism Department a thawktute tan Tourist Lodge Aizawlah awareness campaign neih a ni. Addl.DC Pu John LT Sanga chuan he programme hi a kaihruai a, District AIDS Prevention and Control Unit-a District Programme Manager Dr R.Zonunmawii’n Mizoram leh Aizawl District a HIV/AIDS darh nasat dan leh do dan tur chungchang kalkhawmte a zirtir a ni.

Kum 2017 a National AIDS Control Organisation zirchiannaa a lan danin India ram pumah mi 100 zela mi 0.22 te hi HIV/AIDS positive an ni a, Mizoramah chuan mi 100 zelah mi 2.04 ten HIV/AIDS hrik an pai a ni. Mizoram hi India ram pumah HIV/AIDS hrik pai tamna ber a ni a, Mizoramah pawh Aizawl District a sang ber a ni. Kum 2015 atanga 2016 chhungin Aizawl District ah HIV hrik pai mi 1025 hmuhchhuah a ni a, kum 2018-2019 ah chuan mi 2003 zet HIV hrik pai hmuhchhuah a ni. Nunphung pangngai anga nunglo drugs addict leh KS-te zingah chauh ni lo mipui nawlpuiah a darh nasa hle a. Kum 2018-19 a kai thar hmuhchhuah mi 2003 zinga 11.9% chauh hi heng high risk group atanga hmuhchhuah a ni. HIV hrik pai thar hmuhchhuah zingah hian mahni inringhlela, thisen test tir te aiin, inrinhlelhna nei lem lo, chhan dang vanga inentir, doctor ten HIV test tura an tih avanga thisen test te zingah positive hmuhchhuah an tam zawk a ni.