No.5646/2020-2021

Dated Champhai, the 1st October, 2020: Champhai khawpui thianghlim, mawi leh hrisel siam tura hmalatu Clean, Beautiful and Healthy Champhai Town Committee chu an Adviser Dr.Z.R. Thiamsanga MLA, Health & Family Welfare Board Vice Chairman hovin vawiin khan Champhai DC Conference Hall-ah an thukhawm. He hunah hian hmalak tawhna leh hmachhawp hrang hrangte thlirho a ni.

He hun kaihruaitu Dr. Z.R. Thiamsanga chuan Champhai district chu district lian leh hlun tak, a chhunga chengte pawh zonun ze mawi chhawmnunga nunpui tlattute an ni, a ti a. Tun hmaa district hmingthatna leh hlawhtlinna hrang hrangte sawilangin, tunlai khawvel hmasawn leh thang zelah khawpui fai zawk, thianghlim leh hrisel tak din anih theihna tura hmalak mek zel a ni a, hemi tur hian kan zavaia tanrualna a tul dawn hle a ni, a ti. Champhai mipuite chu khawpui thar din tura tanrual puiah sawmin, hmasawnna ruhrel thawh leh siam kawngah rinawm taka beia khawtlang tana chhawrnahawm, mawi leh tlo din tum turin mawhphurhna latute a chah a. Clean, Beautiful and Healthy Champhai Town chu Champhai Master Plan puahchah mek nena kalkawp tur niin, Champhai North leh Champhai South bial vawngtu MLA te inthuruala thahnemngai taka kalpui mek zel a ni a, Champhai khawpui mai bakah Champhai tihmingtha em em tu Leilet Phaizawl humhalh leh cheimawi kawngah pawh ruahmanna thui tak siam a ni, a ti bawk.

H&FW Board Vice Chairman chuan hriselna kawnga hmasawn nan theihtawp chhuah chhunzawm zel anih thu leh District Hospital Champhai tihchangtlun kawngah tan lak chhunzawm zel anih tur thu a sawi a. Mizorama Covid-19 hri kai tam tak awm zinga thi an la awm lo chu Pathian venna leh kan zavaia thawhhona tha tak vang anih thu sawiin, Sawrkar laipui leh State dangte atang pawha zawhna dawn thin anih thu a sawi a. Covid-19 hri nena chenho thiam angai tawh a, eibar zawn leh nunphung pangngai tibahlah chuang lovin kan himna tura sawrkar duan inkaihhruainate erawh tha taka kan zawm zel a ngai dawn a ni, Dr. Z.R. Thiamsanga chuan a ti. ICMR dan zulzuiin Covid-19 test tura tihte test man leh miharsate thlen man awltir an nih thu sawiin, mahni duh thu renga test duhte tan RT-PCR ah Rs 2500/-, TrueNat ah Rs 1500/- leh RAT ah Rs 500/- zel lak anih thu a sawi bawk. Champhai khawpui thianghlim, mawi leh hrisel siam tura theihtawp chhuahpuiah Champhai mipuite a sawm a ni.

Champhai Bawrhsap Pi Maria C.T Zuali chuan faina leh hriselna ngaihpawimawh a tul thu sawiin, mahni theuhah faina nun bul kan tan angai a ni, a ti a. Kawngpui nek lutuka insak, insakna bungraw chhawp leh hnathawh nana kawngpui hman thinte chu veiawm a tih thu sawiin, khapna thupek chhuah tawh bawhzuia endik hna kalpui anih tur thu a sawi a. VC tinte chu an rorelna huamchhung theuhah dan leh dunte tha taka kengkawh tura hrilhin, VC leh NGO hruaitute chu midangte tana entawntlak ni tura hmahruai turin a chah a. Changkang turin hnathawh tam angai a, hun vawng dik chunga hnathawhna hun tam zawk kan neih theihna turin insiamrem kan ngai hle a ni, a ti bawk.

Champhai District Bawrhsap chuan naktuk atangin faina hapta bultan tum a nih thu pawh sawiin, hemi hun chhung hian Veng, Pisa, Hotel, Restaurant, Zirna In leh hmunhma hrang hrangte tihfai hna thawh tur anih thu leh endikna kalpui anih dawn thu a sawi a. Bawlhhlawh paihna niloa paih an awm thin chu pawi a tih thu sawiin, Champhai larna leilet phaizawl cheimawi kawngah tanlak tum a nih thu a sawi bawk.

Thukhawm chuan Clean, Beautiful and Healthy Champhai Town Committee chu Sub-Committee pathum Clean, Beautiful leh Healthy Sub-Committee-ah te a then a, member turte ruata siamrem turin DC a ruat a, Sub-Committee tinte hian Village Level Sanitation Committee-te hmalakna vilin an enpui thin dawn a ni. Village Level Sanitation Committee din lohna veng/khuaahte din vek tura hriattir nise tih niin, Champhai khawpui chhung mawi leh en hahdam siam turin rualkhai zawka rawng hman tha tih a ni a. Inchung, Step, Shutter leh hmunhma dangahte rawng bik, inang zel hmuhnuam tak hman nise tih a ni a, Member Secretary Pu R.Lalnghakliana, PD DRDA Champhai chu ruahmanna siam tura ruat a ni. Road Protection Squad chungchang pawh rel niin, SDO Sadar kaihhruaiin tun atanga hun reiloteah endik hna kalpui tan tum a ni a, kawngpui nek zawnga hmalate chu thuneitute hnenah hriattir vat nise tih a ni a, Champhai khawpui luhkaah Welcome Gate siam nise ti a rel a ni. Heng bakah hian bawlhhlawh lakkhawm leh sawng bawl kawnga hmalakna tur hrang hrangte sawiho a ni bawk.