No.5645/2020-2021

Faina Hapta 2020 hman dan tur ngaihtuahin vawiin khan Hnahthial khawtlanga NGO hrang hrang aiawh hruaitute leh Sorkar pisa hotute chu District Bawrhsap Pu Vanlalmawia kaihhruaiin a Office Conference Hallah an thukhawm a, naktuk zing dar 7:30 ah Bazar Building kawt zawlah hawnna inkhawm neih ni se an ti.

Meeting kaihruaitu Hnahthial District Bawrhsap Pu Vanlalmawia chuan “Sorkar in mipuite tan cheng tam tak sengin Hall leh kawngpui tha te min siam sak a, lo enkawl fai hi mitin mawhphurhna a ni tih hi kan hriat thar fo a pawimawhin fai tura khawtlang kan inbuatsaihnaah hian kan nunphung leh sukthlek tih danglam ngam a tul thin a, Vantlang hmunhma a mipuite hman tura Inthiarna leh Bawlhhlawh bawm dahte hi enkawltu leh hmang tangkaitu kan nih theuh a pawimawh a ni,” a ti. Faina Hapta 2020 puala khawtlang huapa inelna hrang hrang buatsaih tur chu rampum huap inelna nen kalpui chhunzawm tur a nih thu Hnahthial District Bawrhsap chuan sawiin theihtawp chhuah thar theuh turin kalkhawmte a chah bawk a ni

Meeting chuan Faina hapta pual hian Veng fai, Motel/Hotel & Restaurants, Office/Departmental Complex, School/Institutions fai inelna neih nise an tih bakah Faina kawnga inzirtirna Mobile Video Clip in siam siak te, Drawing/painting Competition buatsaih leh Faina lam inzirtirna kawnga Newspaper ti thate thlan nise an ti bawk a ni.