No.5644/2020-2021

Lawngtlai, Khuangchawi thla ni 1, 2020: Vawiin October ni 1 kha National Voluntary Blood Donation Day niin, Blood Bank, Lawngtlai District leh Association for Voluntary Blood Donation (AVBD) Lawngtlai tang kawp huaihawtin BCM Kohhran Hall, Lawngtlai College Veng-ah "Let's Donate Blood Voluntarily and Contribute to fight against Corona" tih thupui hmangin hun hman a ni.

Blood Bank Officer Dr Beiparysa K. chuan thisen pek chu nun chhanhimna pawimawh tak a nih thu sawiin, mahnia thisen pe thei lote pawh mi dangte'n thisen an pek theihna tura fuih a, zirtirtu kan ni thei a ni, a ti a. Lawngtlai District-ah thisen mamawhna a sang hle a, hemi phuhruk tur hian a thlawn (voluntary)-a thisen pek hi uar sauh sauh a tul a ni, a ti.

Kumin Pawltlak thla (January) atanga Mimkut thla (September) chhung khan District Hospital Lawngtlai Blood Bank-ah thisen unit 923 lak tawh niin, chu'ng zinga unit 779 chu a thlawna pek (voluntary) a ni a, unit 144 chu thlakthlengna (replacement) a ni thung. Hemi hun chhung hian thisen pek runpui (blood donation camp) tum 28 buatsaih niin, he'ng atang hian thisen unit 720 lak a ni.

Vawiina Lawngtlaia National Voluntary Blood Donation Day hmannaah hian October ni 1, 2019 leh October ni 1, 2020 inkar chhunga thisen pe tam mi pathum - Pu Elvis Lalthangzuala, Council Veng; Pu Ramdinsanga, Vengpui-II leh Pu Lalhlimpuia Hnialum, Council Veng te hnenah chawimawina thuziak hlan a ni.

He ni pual hian Thalai Kristian Pawl, College Veng Unit te'n thisen pe nghalin, a vaiin unit 15 an pe a. Thisen petute hi mipa 11 leh hmeichhia 4 an ni.

National Voluntary Blood Donation Day hi a thlawna thisen pek uar tura inzirtir ni atan kum 1975 atang khan India ramah kum tin hman thin a ni a. Indian Society of Blood Transfusion and Immunohaematology founder president leh Blood Bank Society, Chandigarh dintu Dr Jai Gopal Jolly hriat reng nan leh chawimawi nan a pian champha, October ni 1-ah hman thin a ni.