172/2022-2023

Champhai, the 16th April, 2022: Champhai khawpui thianghlim, mawi leh hrisel siam tura hmalatu Clean, Beautiful and Healthy Champhai Town Committee chu an Adviser Dr.Z.R. Thiamsanga MLA, Health & Family Welfare Board Vice Chairman hovin vawiin khan Champhai DC Conference Hall-ah department hotute, tlawmngai pawl leh political party hruaitute an thukhawm.  

He hunah hian thu sawiin Dr Z.R Thiamsanga chuan hrileng avanga sum indaihlohna avanga  hmasawnna duhthusama an ngaihtuah thei lo chu pawi a tih thu a sawi a. Chutih rualin Health Department kaihhnawihah Champhai District chu Mizorama a thawk tha pawl ber a ni thei chu a lawmawm hle a ni, a ti a. Champhai cheimawina tur te, faina kawng leh hriselna kawnga hmasawnna turah kalkhawmte tanhona chu a innghahna lungphum a nih thu a sawi.

H&FW Board Vice Chairman chuan Champhai District-in lirnghing, ran pul hri leh raltlan avangin hun khirh tak a tawk a, sorkar tan hnathawhna hun tam awm lo mah se theihtawp chhuah zel a ni a, Champhai-Aizawl double lane a siam kal mek bakah JJM hnuaiah ni zung chakna hmanga tuilakna chu kalpui thuai tum a ni a. District Hospital Champhaiah cheng vaibelchhe 21.38 sengin khum 50 awmna critical care centre dah tel a ni dawn tih a sawi a. Khum 50 awmna tur Ayush Hospital pawh din tuma hmalak a nih thu a sawi bawk.

Champhai DC Pu James Lalrinchhana chuan Champhai mawi, fai leh hrisel nei turin hrileng karah pawh hmalakna a lo awm reng tawh thu a sawi a. Thahnemngai taka MLA leh khawtlang hruaituten Champhai hmasawnna atana ke an pen chu lawmawm a tih thu a sawi.

He hunah hian kum 2019 a bultan tawh 'Clean, Beautiful and Healthy Champhai' sub-committee pathum ten hma an lo lak tawh dan leh hmachhawp duansate report pein a bawhzui dan tur leh hmalak dan turte, rawtna an neihte sawiho a ni a. Heng bakah hian Mizoram Youth Commission hnuaia Champhaia Coaching Centre dahna tur hmunhma chungchangte an sawiho nghal bawk.

Dr. Z.R Thiamsanga hian tukin khan Champhai Bazarpui, Rahsi Veng tlawhin District Bawrhsap Pu James Lalrinchhana leh Official te nen Bazarpui dinhmun an enfiah a. Bazar hlui tawh cheithat leh thawmthat ngaite endikin Pu Vanlalpara, District Marketing Officer chuan lo dawngsawngin Champhai Bazarpui dinhmun tlangpuite a lo hrilhfiah a ni.