Tukin zingkar atangin state pumah Clean Mizoram Movement hnatlang runpui neih a ni a. Hriat theih chinah Primary atanga Higher Secondary School thlengin Government, Aided leh private school zawng zawngah zirlaiten mahni school leh a vel tifaiin an hnatlang a, hmun tam takah YMA kaihhruaina in vengchhung thenfai hnatlang neih a ni bawk.

Parliamentary Secretary Pu Joseph Lalhimpuia chuan vawiin khan Aizawl khawpui chhunga School hrang hrang hnatlangte hi a tlawh kual a. Nimin tlaia hnatlang runpui thlirletna School Education Director Office chamber-a neihah Parliamentary Secretary Pu Joseph Lalhimpuia chuan rampum huapa hnatlang runpui neih dan chu hun bichilh taka ruahman ni mahse hlawhtling a tih thu leh hnatlang zawng zawngte chungah lawm thu a sawi a. School Education Department hnuaia officer leh thawktu te, tlawmngai pawl leh zirlai pawlte chungah lawmthu a sawi bawk. Thlirletna hunah hian mahni compound tifai lo school an awm thu hriat a nih loh thu report a ni bawk. Hnatlang thlirletnaah hian Parliamentary Secretary; School Education Director leh Officer te an tel a ni.

School naupang hnatlang zat hi zirlai nuai 3 dawn an ni a, YMA hnatlangte nen chuan hnatlang zat hi nuai 3 chuang zet an nih rin a ni.