Tukin zing dar 7 khan Faina Hapta (Cleanliness Week) hawnna inkhawm chu Pu H.Lalhmingthanga, Election Officer kaihruaina hnuaiah Saiha Bazar Traffic point bul-ah neih a ni a. Pu H.Sahlo, Executive Member (LAD), MADC chu khuallian niin,  hawnna inkhawm a hmanpui.

Khuallian Pu H.Sahlo  chuan Hawnna Inkhawm thuchah sawiin, hun kal tawhte thlir let chuan Faina kawnga mipui kan thanghar sawtin, hma kan sawn tawh hle a ni, amaherawh chu kan office te, zirna in te, kan bazaar te leh kan khawlai te thlir erawh chuan hmabak kan la ngah hle a ni ,a ti. Sawi zelin khuallian chuan Faina tlo leh tluantling neih tur chuan rilru fai leh thianghlim kan neih phawt a ngaia, rilru leh ngaituahna a fai hmasak phawt chuan pawnlamah a lang chhuak-in kan pawnlam pawh kan lo fai thin a ni,  a ti bawk.

India Hnampa Mahatma Gandhi piancham vawi 141-na leh Faina Hapta hawnna ni denchhen hian Saiha Officers' Club te chuan Saiha Medical Office nen tang kawpin, a mamawh a piangte tana in entir theina  tur Free Clinic,  Meisatla vengah an hawng a, damlo 300 chuang inentir an awm. Hei bakah hian Saiha Officers' Club chuan  chawhma-ah hnatlang thawkin, DC office complex leh Circuit House te an ti fai a, tlailamah Saiha District Jail, Orphanages' Home 2, Nursing Home leh Civil Hospital te  tlawhin tanpuina tangka fai  Rs. 1000/-theuh an hlan bawk.

He mi vek denchhen hian Pentecostal youth Department (PYD), Saiha UPC (NE) chuan kum danga an lo ti tawh thin angin, zingkarah Saiha Bazaar tih faiin, hnatlang an thawk a. Chawhnu-ah  a mamawh apiangte hman tur Thisen pekna hun Medical Conference hall-ah an hmang a,  thalai mi sawmruk chuangin thisen an pe.