Vawiin khan NLUP Conference Hall-ah Environment Forest & Climate Changte (EF&CC) Department bultumin mi thiamten State Action Plan on Climate Change hmanga sik leh sa inthlak danglam nasa tih ziaawm dan tur chungchang inrawnkhawmna neih a ni a. IISC Bangalore, IIM Ahmedabad leh Deutsche Gesellschaft Für Internationale Zusammenarbeit (GIZ) bakah Mizoram sawrkar a line department officer te an tel a ni.

Expert Consultation Workshop for Prioritizing Actions under the State Action Plan on Climate Change programme hawnna inkhawm hi Principal Chief Conservator of Forests (PCCF) Pu Lalram Thanga, Principal Secretary to Chief Minister ni bawk chuan a kaihruai a. Thusawiin PCCF chuan khawvel hmasawnna kal zelah kan ram ngaw neih that te a chhiat nasat tawh avangin sik leh sa inthlak danglam a nasa a, Mizo piputen fur lo thleng tur an sawi lawk theih thin ang kha tunhnaiah chuan sawi lawk hleih theih lovin a dang lam ta, a ti a. Climate Change hian mihring nun leh khawsak dan nasa taka a nghawng avangin eng tianga beih let tur nge tih ngun taka zirchian a, chak taka hmalak a tul tak zet tawh a ni, a ti.

He workshop in a tum ber chu tui, ram ngaw, agriculture, mihring chen tamna khawpui leh hmun dangten sik leh sa inthlak danglam nasa a nghawng dan zirchian leh tihziaawm dan ngaihtuah a, Sector tina mi thiamte kaihhruaina hnuaiah a kaihhnawih department ten mawhphurhna tha taka an hlenchhuah a tulzia inhrilhhriat a ni a. Hei bakah hian zirna in hrang hrang nen thawhhona tha tak siam tum niin hei hian Climate Change in a nghawng zir chianna ah te, district leh block level-a sik leh sa inthlak danglam avanga an tawrh theih dan zirchianna ah te, hmalak dan tur kawng mumal duan chhuah leh National Mission For Sustaining The Himalayan Ecosystem (NMHSE) phut anga knowledge centre te hnathawk tak tak tura buatsaih te a tel a ni.

Workshop hawnna inkhawmah hian Kenneth Pala, GIZ leh Tsewang Gyaltson, EF&CC ten thu an sawi a. IISC, Bangalore atanga lokal Professor NH Ravindranath leh PCCF Pu Lalram Thanga ten Mizoram SAPCC abstract leh flyer an tlangzarh a ni.