Vawiin khan Finance Minister Pu Lasawta’n sum enkawl leh vawn dan zirna, Accounting & Financial Management Institute(AFMI) Khatla Peter Street a mi chu a hawng.

Pu Lalsawta chuan sum enkawl leh vawn dan chungchangah chuan “Lian tura te lua engmah a awm lo va, tlu chhe tura lian lua pawh a awm na hek lo” tih thufing chu chhungkua atanga intan in pawl ah leh sumdawnna ah te, office lian ber thlengin a dik kumkhua dawn a ni, a ti a. Financial managment fel tawk lohna ah chuan company lian tak tak te pawh an tla chhe thuai a. Sum enkawl kawnga mi rintlak leh pawl tana sum hmanzai dan thiam te kaihhruaina hnuaia managment nei tha apiang te enkawl chu pawl leh sorkar pawh an hlawhtlin nge nge thin, a ti bawk. Nakum April thla atanga Mizoram sorkarin bungraw chhiah GST a lak tur ah te, New Economic Development Policy atan te fincial managment leh accounting thiam pawimawhna a nasa tial tial dawn tiin Pu Sawta chuan heng atan hian AFMI chu a pawimawh hle dawn a ni, a ti.

Tun hnaia India sorkar-in cheng 500 leh 1000 note a tihtawp chungchangah Pu Lalsawta chuan pawisa lem lengvel leh dan lova sum chheprelhin ram economy a tih chhiat theih dan leh ram himna thlenga a tih derthawn theih dan sawiin hun eng emaw chhung chu buaithlak deuh mah se, manganna tur a awm lo, a ti a. Mipuiin sum hman tur ah harsatna an tawh loh nan sorkar in contractor leh supplier te sum pawh a pe chhuak rih dawn lo a ni, a ti.

AFMI hawnna function hi Dr.Joseph Lalhmingthanga’n a kaihruai a. Pu Lalmalsawma, Addl.Secretary, Finance in sorkar sum vawn dan chungchangah thu a sawi bawk a. AFMI hi Mizoram sorkara Firm & Society hnuaia Zo Financial Solutions(ZOFINS)hmalakna niin commerce background nei sa lo te tan finance leh account lam chungchang hriatthiam awlsam zawka zirna tura buatsaih a ni a. Course an pek theihte chu Basic Accounting and Book keeping, Inventory Management leh Tally te a ni a. Sorkar hnathawk te, sumdawng mek leh sumdawnna bul tan tur te, zirlai leh hna zawng mek te, pawl leh kohhran te tan pawh heng course te hi zawm theih a ni. Course hi module 3 ah thenin module pakhat hi hapta kar li zel awh tur a ni a. Batch hmasa ber chu November ni 15 hian kalpui tan a ni dawn a ni.