Kolasib District chhunga zirna in hma a sawn dan leh hmalak zel dan tur ngaihtuahin vawiin khan District Education Committee chu an chairman District Bawrhsap Pu H.Lalengmawia hovin DC Conference Hall-ah an thukhawm.

Bawrhsap chuan ram tharchhuah leh thawhchhuah nei tamlo tan chuan a chhunga chente theihna tih hriam a pawimawh thu sawiin, hemi atan hian zirna tha a pawimawh takzet thu a sawi a. Zirna Department a thawk te rilru leh tihtakzeta zirna tha pek vei a, midang te fuih phurtu a tang thin turin a ngen a. Inthlahdah lo a taima taka zirtir hna thawk turin zirtirtu te a ngen nghal bawk.

Kolasib District a Kum 2015-2016 chhunga zirna atana hmalakna te: zirlai bu naupang 12774 hnenah sem a ni a, school uniform naupang 9767 hnenah sem a ni a. Bualpui N ah chhungkaw khawsak harsa zual tan Residential Girls Hostel naupang 50 len theihna a awm a ni. Chenna khua 67 ten Lower Primary School an nei a, heng zingah 65 te chuan Upper Primary School an nei tel a ni. School kalrual kal silo naupang 322 hnenah special training pek a ni a, heng zinga naupang 163 te chu Residential leh Non-Residential Special Training Centre kaltlangin an kum mil tawk pawlah school pangngaiah kalzawm tir an ni.

Zirna tihhmasawnna atan leh thil pawimawh inhrilhhriatna a tan Rs.2.5lacs sen a ni. Kolasib Block leh Kawnpui Block huamchhunga zirtirtu 640 te In-service Teachers Training neih tir a ni a. August 2016 thlengin Mid Day Meal naupang 12,659 hnenah pek a ni a, chaw chhum leh a puitu 383 an awm mek a ni.

Committee hian district chhunga zirna in hma a sawn zel theih nan zirna department a thawk te, zirtirtu te, zirlai nu leh pa te leh khawtlang hruaitute thawhhona tha tak nen a tan lak ho a pawimawh thu sawi a ni a. School hmunhma tihhmasawnna atan leh zirtirna puitu atana sum hmuh te a nihna taka hman a nih theih nan thawhho that a pawimawh thu sawi a ni a. Science leh Mathematics ah hmasawnna atan a bu zir mai lova a tak ngeia tih a ni ve theih nan hmanrua lei a nih theih nan hmalak ngai te lak ni se tih a ni.

Kolasib District ah tun dinhmunah SSA hnuaiah Lower Primary School 90 leh Upper Primary School 79 a awm mek a. SSA hnuaiah zirtirtu 333 an awm mek bawk.