Vawiin khan Mizoram State Olympic Association (MSOA) chuan an President Chief Minister Pu Lal Thanhawla hovin CM Office Chamber-ah Executive Meeting an nei. He meeting-ah hian MSOA in Olympic 2016-a Mizo thalaite tel ve thei tura a hnathawhte thlir hovin, hmalak zel dan tur an rel a ni.

Chief Minister chuan kum 2016-a Olympic Games neih turah India aiawha Mizo tirh chhuah chu MSOA in a tum leh duhthusam a ni a. An inbuatsaihna ringawtah pawh khawvel huap inelna hrang hrangah tel tawhin, an la tel zel ang a. Heng atang hian experience hlu tak an nei dawn a ni, a ti.

MSOA Sr. Vice President leh Sports and Youth Services Minister ni bawk Pu Zodintluanga pawhin Mizo thalaite tan India team-a tel theihna chance a awm nan leh, a remchan anga sum leh hmanrua a puih chu MSOA duh dan a ni, a ti bawk.

Vawiin meeting-ah hian Olympic Games-a tel thei tur awm infiammi thlanchhuahte (Olympic Probables) tanpui dan tur kawng hrang hrang sawiho a ni a. Heng bakah hian Olympic Day Run 2014 hman dan tur te leh hmalakna dang hrang hrang ngaihtuahho a ni.

International Olympic Committee (IOC)-in December, 2012-a Indian Olympic Association (IOC) a suspend hnu ah February ni 12, 2014 khan IOC in IOA a suspend-na hi hlipin, New Delhi-a IOA hruaitu thar thlanna ah pawh MSOA atangin aiawh an tel a ni.