Hemi ni vek hian Chief Minister chuan Czechoslavakia Ambassador Pu Hynek Kronilek chu a chenna inah a tlawh a, Mizoramah rawn zin thuai tura sawmin Czech leh Mizoram sorkar ten airport hmanrua leh transport tihchangtlun leh kawlphetha lamah thawk dun turin a sawm bawk a ni. Czech Ambassador chuan Pu Lal Thanhawla Chief Minister a nih lawmpuina thu hrilhin, Mizoram chu vawi thum lai a tlawh tawh thu leh an ram technical expert te nen Mizoram rawn zin thuai a tum thu CM hnenah a sawi a ni.

Nimin khan Chief Minister chuan Human Resources Development Minister Pu Arjun Singh chu ama chenna inah tlawhin Mizorama hmalakna tur hrang hrang an sawiho a ni. Pu Arjun Singh pawhin Pu Lal Thanhawla Chief Minister a nih lawmpuina thu hlanin Mizoramah Hindi Directorate din te, SSA hnuaia sum chu tangkai zawka hman theih dan tur leh HRD hnuaia programme tam zawk Mizoram atan ruahman chungchang an sawi dun a ni.

Chief Minister hi I&PR Minister Pu Zodintluanga leh I&PR Director Pu L.R. Sailo ten an tawiawm a ni.