DOEACC Society, Aizawl Centre a zirlai naupangte tana Mipa lrh Hmeichhe Hostel sak thar chu vawiin khan Zuangtui ah Chief minister Pu Lal Thanhawla chuan a hawng.
 
 

Chief Minister chuan Informatin Technology lama zir duh tena an nghahhlelh em em hostel hawn theiha a awm ta chu lawmawm atih thu a sawi a. DOEACC in hostel a neih theih nan hian nasa taka tunhma atang tawha hma a lo lak tawh thin thu sawilangin, mi pawimawh tak takte alo sawipui tawh a ni a ti a. Tunlai khawvel changkang tawh takah hian awlsam tak leh man sen pawh ngailovin internet hmangin zirlai ten an duh ang lehkhabu te an hmu zung zung thei tawh a, engkim mai kan duhzawng tawh phawt chu duh hun huna kan hmu mai theite hian keini ang computer lama thiamna nei ve hranpa lo tan chuan mi chuangtlai leh hmantlak lo kan ni thuai ta mai a ni, a ti a. Chuvangin Information Technology lam zir uara, hemi lama keini aia lo zirthiam hmasa zawk te, kiltin atanga min rawn run thei ho hi kan dolet theih nan thiamna hmantlak kan zirchhuah hi a tul hle a ni a ti. Sorkar felfai kalpui tur pawhin information technology a kan innghah a pawimawh a, chumi nei thei tur chuan capacity building lam te uar zawka kal chhoh pui a tul thu a sawi bawk.

Pu Hawla chuan Hostel te hi tluang tak leh tha taka kan zirna kan puitlin theih nan leh khawdang atanga zirna duhte tana din a nih thu sawiin, naupang zirlai awm turte pawhin tangkai tak leh hlawk taka an hman ngei theih nan Chief Minister chuan duhsakna a hlan a ni.

DOEACC Students Hostel sakna senso hi Ministry of Housing & Urban Poverty Alleviation, Govt of India tum a ni a, A sak hna hi NBCC, Govt of India Enterprise in a tum thung a, a Nodal Department chu UD & PA, Govt of Mizoram a ni. A sakna senso zawng zawng hi Cheng nuai 1247, sing 7 leh sang 6 a ni. Mipa hostel ah hian zirlai 100 an awm thei dawn a, Hmeichhe hostelah hian zirlai 50 an awm thei bawk dawn a ni. Hostel hian Choka, Dining hall, Recreation room, Computer room, Library leh Store room a nei ve ve a, electrical sub station 250 kv DG Set dah nghal a ni bawk. Hostel te hi RCC building niin, chhawng 5 ve ve a sak a ni.

DOEACC Aizawl Centre hi kum 2001 khan Autonomous Scientific Society of Department of Information Technology, Ministry of Communication & Information Technology, Govt of India din a ni a. India hmun hrang hrangah a vaiin centre 10 a awm mek a. Mizoramah hian Aizawl Centre tihloh, district khawpui zawng zawngah a branch din tum mek a ni a. Tunah hian zirna course long term leh short term course te awmin, long term course hnuaiah hian Information Technology Department leh Electronics Design & Technology Department te a awm a. A hmasa zawk IT Deptt hnuaiah hian zirna chi hrang hrang 6 leh EDT Deptt hnuaiah hian 3 a awm bawk a. Short term course hnuaiah hian zirna chi hrang hrang 4 a awm mek bawk a ni.

Hostel hawnna inkhawm hi Pu P. Lianhrima, Secretary, UD&PA in a kaihruai a. Chief Minister hi a nupui Pi Lal Riliani bakah Pu Zodintluanga, IT Minister leh Parliamtary Secretaries te, Board Chairman te leh MLA ten an tawiawm a ni.
 
 
 
 

Attachment

  • Loading attachment...