No.2442/2021-2022 

Aizawl, the 2^nd October 2021: India ram Hnampa Mahatma Gandhi piancham 152-naah amah hriatreng nan leh zahna lantir nan India rama State dangte rualin tukin zing dar 7:30 khan Chief Minister Pu Zoramthanga leh Sorkar hotu pawimawh dang ten Pu Gandhi-a lim,  Zodin Square, MG Road-ah zahna pangpar an dah.

Chief Minister Pu Zoramthanga in hma hruaiin zahna pangpar a dah hmasa ber a. Deputy Chief Minister Pu Tawnluia  leh Speaker Pu Lalrinliana Sailo ten an dah leh hnuah Minister te, MLA te leh Sawrkar hnathawk  ten zahna pangpar an dah chhunzawm a ni.

Tukina Pu Gandhi lim bula zahna pangpar dah tute zingah hian Home Minister Pu Lalchamliana, Pu C.Lalrinsanga, Agriculture Minister, Dy Speaker Er Lalrinawma, Pu Lalchhandama Ralte, School Education Minister, Pu K. Beichhua, Social Welfare Minister, Pu L. Thangmawia, MLA leh Pu H. Lalzirliana, MLA te an tel a. Chief Secretary Pu Lalnunmawia Chuaungo, Addl CS Pu JC Ramthanga leh DGP Pu SBK Singh te bakah sawrkar hotulu te an tel bawk a ni.

Gandhi piancham hi India Sorkar-in ram pum chawlh (National Holiday) atan a a puan awm chhun zing ami a ni a. Kum 2007 khan United Nations General Assembly chuan October ni 2 hi ‘International Day of Non-Violence’-ah an lo puang nghe nghe a ni.