Pachhunga University College(PUC) Mizo Department buatsaihin vawiin khan Saikuti Hall, Lunglei-ah ‘Seminar on Hla Mawi Kutpui : Mizo Literature-a Serkawn Concert Pawimawhna’ neih a ni a. Mizo Literature-a Serkawn Concert (1932-1946) pawimawhna chungchang zirhona hi Chief Minister Pu Lal Thanhawla chuan a hmanpui a; Parliamentary Secretary Pu Joseph Lalhimpuia chu Khualzahawm niin Lunglei High Power Committee Vice Chairman Pu S.Laldingliana pawh he hunah hian a tel bawk.

Seminar hawnna inkhawm Lunglei Govt. College Principal Pi Lalhmangaihi kaihhruaiah Khuallian Pu Lal Thanhawla chuan Mizo hnam nunzia, thu leh hla thanchho zelnaah ‘Serkawn Concert’ chuan hmun a luah pawimawhna chu vawiin thlenga a chungchang kan la khel hian a tichiang hle a ni, a ti a. Mizo hnamzerang mawizia leh Mizo tawng hausakzia sawiin Pu Lal Thanhawla chuan thangthar zelte pawhin Mizo tawng hi dik taka hmang a, hnam nunphung leh tawng hi vawnhim reng hi kan tih makmawh a ni, a ti. Mithiamten ‘Tibeto-Burman’ tawng an tih zingah Mizo tawng chu a hausa ber leh thu leh hla pawh nei mawiin nei tha ber pawl a nia a hriat thu a tarlang a; khawvel changkang zelin Mizo hnamzia leh thalaite nun a tidal mek hi siamthat tul a, Mizo hnam tan thil ropui dang ti thei lo mahila, mitin ten kan tih theih chu kan Mizo hnam nun leh tawng chhawmnun reng hi a ni tiin kalkhawmte a fuih a. Vawiiina Seminar neih taka chuan Mizoram dung leh vanga awm zawng zawngte thu takin a nghawng ngei ang a, Mizo zawng zawngte tan a lak tir sauh sauh a beisei thu a sawi bawk. Mizoram leh Mizo hnam chanchin leh khawtlang kalphungah Chhimlam hian thui takin hma a lo hruai tawh thin thu tarlangin, Chief Minsiter chuan vawiina Serkhan Concert chungchang zirhona chuan chhimlam tan hun thar duhawm tak herhchhuahpui ngei turin duhsakna a hlan a ni.

Khualzahawm Pu Joseph Lalhimpuia pawhin thu sawiin Mizote thu leh hla a ahausak theihna chhan chu Zosap missionary-ten Mizo tawng hawrawp ‘a, aw, b’ an siamsak a, zai leh rimawi lamah nasa takin an kaihhruai vang a ni a, heng zawng zawngte hi Mizote tana Pathian hnathawh ropui tak rah a ni, a ti. Zosapte inpekna leh thawhrimna avangin Serkawn Sikul atangin Mizo fa hmingtha leh ropui tak tak engemawzat an chher chhuak a, lehkhazir bakah thu leh hla leh khawtlnag nunphung tha zawk an zirtir a ni, a ti bawk. Kum 1935-a YLA din a nih hma kum 1934 khan ‘Lungleh Association’ a lo din tawh thu te; kum 1935-ah ‘Sikul-ah vai tawng zir a tul em’ tih thupui hmangin debate an lo huaihawt tawh thu te; Mizote inchibai dan tur an rel thu te leh Serkawn-ah Solfa hmanga an zai thin chu mipuiin ‘Serkawn Zai’ tia an sawi thin thu te a sawi a. A hnuaia Education Department hmalakna thenkhatte pawh tarlangin Pu Joseph Lalhimpuia chuan Chief Minister hmalakna zarah Mizoram-a zirna in leh private hostel zawng zawngte tan ‘Hostel Rules’ felfai takin duan a nih mek thu leh Middle leh High School-te tan Maths & Science zirtirtu tur liau liau lak chho mek a ni, a ti.

Seminar hawnnaah hian Pu R.L.Thanmawia, Controller of Examinations, MZU chuan Keynote address sawi a. Serkawn sikul chu Mizorama Chanchin Tha meichher rawn chhi luttu hmasa Sau Upa leh Pu Buanga ten kum 1903-a an din a ni a; he sikul hian chhimbiala zirna meichher chhitu nihna piah lamah Mizote thu leh hla chanchina dinhmun pawimawh tak luahtu a ni, a ti a. Sikul hotu ber Zochhawni Pa (H.W.Carter) leh sikul zirtirtu dangten sap hla an letling a, lemchan an ziak a, hla te pawh an phuah a; tun hmain helam zawngah Mizote kut la hlei lo mahse Serkaw sikul atang hian rilru leh tihtakzeta an han beih chuan thu leh hla tha tak tak a lo chhuak ta a ni tiin Serkawn Concert chungchang a sawi.

Seminar Coordinator Dr.Zoramdinthara, Asst. Professor, Dept of Mizo, PUC chuan Seminar chhimtu zawng zawngte lawmna thu a sawi a. Kum 1996 chho vela NEHU hnuaia Mizo subject bika MA zirna a awm theih nana sum mamawh Cheng nuai 16 chu NEHU-in a pe theih lova, chu chu hriain Chief Minister Pu Lal Thanhawla chuan a thahnemngaihna avangin an sum mamawh chu a phuhruk sak a, vawiin Mizo tawng atana pawimawh em em Seminar-ah Khuallian nihna a chan chu a awm takzet a ni, a ti bawk. Vawiin Seminar-ah hian a huaihawttu PUC College Principal Dr.Tawnenga pawhin thu a sawi a, Serkawn sikul awmna thin khua ngeiah he Seminar hi an nghat theih chu a lawmawm hle a ni, a ti.

Kum 1932 leh 1946 inkar chhung khan Serkawn School zirtirtute chuan Mizo hla tha tak tak phuah chhuakin, chung hlate chu kum tawpah zirlaiten sain concert an buatsaih thin a. Hemi hunlaia an hla phuahte hi Mizo lenglawng hla (secular song) lo chhuahna bul pawimawh tak an ni a, tunlai hun thlenga Mizo lenglawng hla tha leh poetry tha lo chhuahna a ni. Heng hunlaia hla phuahtu zingah hian Lalmama, Liandala, Chhuana, H.W.Carter (Zochhawni pa), Nuchhungi leh midangte chu hla phuahtu langsar te an ni.

Pachhunga University College, Mizo Department buatsaih he seminar ‘Hla mawi kutpui : Mizo literature-a Serkawn Concert pawimawhna (Concert of Voices : Underlining Serkawn concert with Mizo Literature) buatsaih hi Lunglei Government College leh Govt. J.Buana College nen tangkawpa neih a ni a. Seminar-ah hian Pu Lalhmingthanga Colney (IAS rtd), Pi Enid H.Lalrammuani, Pu H.Laldinmawia, Pu Remlalthlamuanpuia, Pu Lalrotlanga Pachhunga University College zirtirtu leh Pi Lalsangpuii, Lunglei Government College zirtirtu te chuan Serkawn Concert-in Mizo literature a tih hausak dan leh a pawimawhna hrang hrang an ziak chu zirho a ni.

He seminar hmang tur hian PU College, Govt. Hrangbana College, Government Lungei College, Govt. JB College, Mizoram University zirlaite leh zirtirtute an tel a, sorkar mi pawimawh leh mithiam thahnem tak an tel baka zaithiam hrang hrang ten Serkawn Concert hla te an sa bawk.