No.780/2021-2022

Aizawl the 2nd June 2021 : Vawiin khan Chief Minister’s Relief Fund (CMRF) hman dan tur ngaihtuahtu Committee on Utilization of Chief Minister’s Relief Fund for COVID-19 chu an Chairman Pu Lalnunmawia Chuaungo, Chief Secretary hovin Chief Secretary’s Conference Hall, MINECO-ah an thukhawm. Lockdown puan chhunga harsatna tawk, chhuanchhamte tanpui nan leh COVID-19 avanga harsatna tawk te tan cheng nuai za sawmpasarih singli leh sangruk (Rs. 1,17,46,000) semchhuah an remti. He committee-ah hian Addl.Chief Secretary Pu JC Ramthanga chu Co-Chairman niin, Finance Commisioner Pu Vanlalchhuanga chu Member Secretary a ni a, tlawmngai pawl NGO Co-ordination Committee aiawh Pu Vanlalruata CYMA President leh Mizoram Kohhran Hruaitute Committee (MKHC) Secretary Rev R.Lalrinsanga te chu member an ni.

COVID-19 hripui leng mekin zual lam a pan zel avangin Aizawl khawpui leh District Headquarters hrang hrangah thla khat chuang inkhuahkhirhna khauh taka kalpui a ni ta a. Lockdown avangin mahni eizawnna hna thawk chhunzawm thei lo mi engemawzatin harsatna namen lo an tawh mek karah veng leh khaw hrang hranga Local/Village Level Task Force ten chhawmdawl hna an thawk zel a. He hun harsa Mizoramin a tawn mek lai hian CMRF chu a tul dan anga mamawhtute hnenah sem chhuah zel niin vawiin meeting pawh hian uluk taka a ngaihtuah hnuah Aizawl District chhunga chhuanchham LLTF ten Aizawl DC hnena report an thehluh - chhungkaw 3063 tan cheng nuai sawmruk pakhat singhnih leh sangruk (Rs 61,26,000) dah ni se tiin an rel a. Lunglei DC kutah cheng nuai 10, District dang zawng tan cheng nuai 5 theuh dah ni se tiin CMRF sem dan ngaihtuahtu Committee chuan vawiin khan a rel a ni.

Vairengte-a Golgotha Camping Centre harsatna tawh mek chungchang sawiho niin he Centre-ah hian mi 40 zet COVID19 positive an awm tawh a, Camp chu Quarantine Centre anga hmangin hri kai ve lo te pawh quarantine vek an ni. Harsatna lian tak hmachhawn mek Golgotha Camping Centre tan hian cheng nuai 1 (Rs.1,00,000) dah ni se tiin Committee chuan a rel a ni. Mizoram pawna COVID19 hri kai, an awmna state ah leh Mizoram lamah pawh chhungte belh leh pur tur nei lo, harsatna lian tak tawk mek mi pahnih hnenah chhawmdawlna sum cheng singkhat (Rs.10,000) ve ve hlan ni se an ti bawk.

Tun dinhmunah CM Relief Fund-ah Rs 1,36,24,137 a awm mek a. Heta tang hian vawiin meeting chuan Rs. 117,46,000 semchhuah a rel a. Lockdown vanga Mizoram chhung hmun hrang hranga chhungkaw harsa engemawzat te tan thla hmasa khan Rs.91,50,000 sem a lo ni tawh bawk a ni.