No.779/2021-2022

Siaha; 2nd June, 2021: Vawiin chawhma dar 7:00 AM atang khan Dr.K.Beichhua, Minister of State for SWD,AH & Vety etc. chuan Tisopi-I&II khuaa VLTF duty te tlawhin, Covid-19 lockdown avanga chhungkaw harsatna tawkte chhawmdawlna tur sumfai Rs.10,000/- ve ve MLA Fund atangin a hlan a ni.

Minister hian Siaha khawpui hneh taka chawmtu tur Augmentation of Urban Water Supply Scheme(AUWSS) hnuaia Gravity hmanga Thange Lui atanga tui lakna siam chu a enfiah nghal a ni.

PHE,Siaha Division hian Gravity leh Pump hmangin Siaha Town hi tui a pe a, Low voltage avangin Pump hian a pump theih tur zat atangin 60% chauh a pump thei a, low voltage avang bawk hian pump khawl hi a chhe deuh reng bawk thin a ni. Kawng laih avangin Gravity hmanga tuilakna Line hi a chhe deuh reng bawk thin avangin Siaha Town in tui-ah harsatna namen lo a tawk thin a. Siaha Town in nitina a tui mamawh zat hi 14,00,000 litre a ni laiin, tun dinhmunah chuan Litre 7,00,000 chauh PHE hian a pe thei a ni.

Minister Dr.K.Beichhua chuan Tui a kan harsatna te chu PHE changtu, Deputy Chief Minister ni bawk hnenah a thlenin, Deputy CM chuan Special Assistance to States for Capital Expenditure atangin ruahmanna lo siam sakin, Cheng nuai Rs.800/- estimate siamah, Cheng nuai Rs.782.765/- fund dawn a ni ta a ni. He Augmentation of Urban Water Supply scheme hnuaiah hian Gravity hmangin Thange Lui atangin Siaha khawpui hi 100mm Dia Pipe,23Km length hmangin tui pek a ni dawn a ni.

He AUWSS hna hi kumin March ni 16 a thawh tan kha a ni a. Tunah hna hi thawhzawh tawh a ni a, Phai lam atanga Media Filter lo thlen hunah hman nghal thei a ni ang. Pu Lalnunthanaga, EE, PHE chuan July thla atang chuan Siaha khawpui hian nipui lai pawhin nitin tui 14,00,000 litre a a hmu thei tawh dawn a ni. Furah phei chuan nitin tui litre 17,00,000 a hmu thei ang, July thla atang chuan Tui Connection thar pawh a pekchhuah leh theih tawh ang, a ti.

Minister chuan AUWSS,Siaha hi Kum 1 chhunga thawhzawh tura beisei a ni laiin, Covid-19 lockdown hmang tangkaiin, work force thahnem tak nen ramah riahchilhin,thla tlem chhungin Pu Lalnunthanga,EE,PHE leh a nauten an zo thei mai hi a lawmawm tak zet a ni, an thawhrimnaah fak an phu hle a ni, a ti.

Minister chuan AUWSS enfiahnaah thu sawiin, Tui harsatna khua reng reng, khua hrisel leh changkan an ni ngai lo, taksa leh rilru lama hmasawnna thlengin a nghawng thei a ni.

Tunah chuan Siaha khawpui hi tuiah a hnianghnar tawh dawn avangin, Siaha mipui te hi rilru leh taksa lamah hma kan sawn phah ngei ka beisei tlat a ni, a ti.