No.1016/2021-2022
Aizawl the 17th June, 2021: Vawiin khan Chief Minister’s Relief Fund (CMRF) hman dan tur ngaihtuahtu Committee on Utilization of Chief Minister’s Relief Fund for COVID-19 chu an Chairman Pu Lalnunmawia Chuaungo, Chief Secretary hovin Chief Secretary’s Conference Hall, MINECO-ah an thukhawm. Lockdown puan chhunga district hrang hranga harsatna tawk, chhuanchhamte tanpui nan Rs. 1,55,98,000 semchhuah an remti.

He committee-ah hian Addl.Chief Secretary Pu JC Ramthanga chu Co-Chairman niin, Finance Commisioner Pu Vanlalchhuanga chu Member Secretary a ni a, tlawmngai pawl NGO Co-ordination Committee aiawh Pu Vanlalruata CYMA President leh Mizoram Kohhran Hruaitute Committee (MKHC) Secretary Rev R.Lalrinsanga te chu member an ni.

Sanction order chhuak nghalin, Aizawl district tan Rs. 89,78,000 ruahman niin, Lunglei district tan Rs. 12,00,000 dahin, Siaha, Lawngtlai leh Champhai district te Rs. 7,50,000 theuh pek an ni a. Kolasib, Mamit, Serchhip, Saitual, Khawzawl leh Hnahthial district tan Rs. 5,00,000 theuh sanction a ni bawk. Heng bakah hian Aizawl district a Sairang Dinthar tan Rs. 50,000, Lawngtlai district a Kar Lui tan Rs. 20,000 leh Champhai YMA Sub-Hqrs tan Rs. 1,00,000 sanction a ni bawk.

COVID-19 hripui leng mekin ziaawm a la pan theih meuhloh avangin inkharkhipna pawhsei a ni a. Hemi chhunga thawhchhuah neilote'n harsatna an tawh dan hriain, a tul dan ang anga CM Relief Fund for COVID-19 atangin chhawmdawl ngaite puihna tur hi ruahman a ni a. Tun hrileng thawh hnihnaah hian chhuanchhamte puihna CM Relief Fund atang hian tum hnih pekchhuah tawh niin tun hi a tum thumna tur a ni.