No.1015/2021-2022

Aizawl, 17th June, 2021 : Vawiin khan Health Minister Dr. R. Lalthangliana’n Lunglei Civil Hospital compoundah Laboratory building changtlung tak, RT-PCR khawl pawh dah tel theihna tur sak hna thawk turin hma lak tan a nih thu a sawi.

MINECO-a Contact Tracing chungchang sawihonaah he thu hi sawiin Health Minister Dr. R. Lalthangliana chuan Lunglei Civil Hospital Compoundah Laboratory changtlung tak, Mizoram chhim lam district pali ten tangkai taka an hman theih tur sak tumin sawrkarin cheng nuai 781 man DPR a siam a, Chief Minister Pu Zoramthanga’n D.O letter nen NEC leh DoNER Ministry ah a umzui bakah amah ngei pawhin a chhu zui reng tih sawiin, he laboratory sakna tur hi engtikah nge kan hmuh theih dawn tih a la hriat chiah rih loh laiin Chief Minister hmalakna leh thahnemngaihna zarah Mizoram sawrkar chuan a building sak hna tan nghal turin ruahmanna kan lo siam fel tawh a ni, a ti a. Laboratory building sakna tur hmunhma leh a building sak dan tur drawing ruahman sa vek ni tawhin Architect leh Engineer ten hma an la nghal a ni, a ti bawk. Laboratory building changtlung tak a awm chuan natna hmuhchhuah hma kawnga Mizoram chhim lamin harsatna tam tak kan tawhte kan sukiang thei dawn a, Chief Ministerin ruahmanna a siam hi a lawmawm takzet a ni, a ti bawk.

Vawiin meetingah hian Contact Tracing kalpui dan leh hmalak zel dan tur sawiho niin rawtna thar tha tak tak siam a ni a, a tul angin sawrkar thuneituten an bawhzui ang. State dangte nenn khaikhina positive hmuhchhuah zat percentage a tlakhniam chak loh chhan chu contact tracing ngawrh leh chipchiar taka kalpui a nih a test ngeite test zel a nih vang a nih thu sawi a ni a, India ram hmun dangah Mizoram anga uluk leh chipchiara contact tracing kalpui an awm tawh meuh loh thu tarlan niin, positive case tlahniam chak lo mahse hma kan sawn nia a lan thu an sawi a, tun anga contact tracing chak taka kalpui zel a nih chuan reiloteah kan dinhmun a that thuai a beiseiawm thu sawi a ni.

Nimin June ni 16, 2021 thleng khan mizoramah vaccine dose 388760 pekchhuah tawh niin heng zingah hian private hospital atanga vaccine dose khatna la mi 11 chhiar tel an ni a. Vaccine full dose la tawh hi mi 53272 awmin. Kum 18 – 44 inkar hnenah vaccine dose khatna mi 86937 hnenah pek tawh niin heng zingah hian private hospital atanga vaccine la mi 10 chhiar tel an ni. Niminah khan kum 18 – 44 inkar hnenah vaccine dose 20445 pek a ni a, kum 18 – 44 inkar vaccine pek ngai hi mi nuai 5 bawr vel ni tura chhut a ni. Meetingah hian sawrkar laipuiin inkaihhruaina a siamah vaccine lak dawna COVID-19 sample test a rem tih loh thu tarlan a ni bawk.

Health Minister chuan Non-Government Hospital Association of Mizoram ten mipui rawngbawlna a ngaia help nei miah lova vaccine 12000 pekchhuah tur an chah thleng chu lawmawm a tih thu sawiin, vaccine pek kawngah chak takin sawrkarin hma a la a, vaccine la thei zawng zawng a hma thei ang bera pek kim tumin theihtawp kan chhuah a ni, a ti.

Vawiin meetingah hian MOT Chairman Dr ZR Thiamsanga, MLA, H&FW leh Police hotute bakah Addl DC, Aizawl, Aizawl City Local Council Association leh MOT member te an tel a ni.