No.576/2021-2022

Hnahthial the 19th May 2021 - Chief Minister’s Relief Fund for Covid-19 atanga Hnahthial District-in Rs.2,50,000 a dawn hman dan tur ngaihtuahin vawiin khan Hnahthial khawpui chhunga VCP te, YMA Branch President theuh te leh Kohhran hrang hrang Pastor-te chu District Bawrhsap Pu H. Dolianbuaia hovin Hnahthial DC Conference Hall-ah an thukawm a. CM Relief Fund atanga sum dawn hi YMA Branch hrang hrang ten an huamchhungah semchhuak se an ti.

Meeting kaihruaitu District Bawrhsap Pu H.Dolianbuaia chuan tanpuina pekchhuah chu a dawng tur awm tak ten an dawn theih nan uluk taka ngaihtuah a tul thu leh Kohran, YMA leh VLTF te an luangchhuak thin chu lawmawm a tih thu a sawi bakah Covid-19 hrileng do chu khauh taka kalpui a tul thu sawiin “hrileng hian mitin nunphung a nghawng a, kan himna tura inzirtir tam a ngai a ni” a ti bawk.

Kalkhawmte chuan CM Relief Fund atanga Hnahthial District-in tanpuina pawisa a hmuh chu Hnahthial khawpui chhung YMA Branch 8-ah Rs.Nuai 1 vel semchhuah phawt nise, YMA branch hrang hrangte hian an huamchhung ah theuh tanpui turte lo thlang se la, chung mite hnenah chuan a pawisa fai in emaw eitur in emaw pek mai nise an ti.

Kohhran leh vengchhung dinhmun hrang hrang he huna an tarlan atanga a lan danin Hnahthial khawpui chhungah chhuanchham an awm hriat ala ni lova, tualchhung Kohhran thenkhat ten an veng VLTF-ah tanpuina sum chhunglut a, thenkhat chuan an mahni kohhran member tanpui ngai nia an hriat an tanpui hlawm bawk a ni. YMA leh VLTF lamah Electric, Bazar Kanaan, Peniel leh Chanmari te chuan an veng chhungah tanpuina an semchhuah tawh thu tarlangin Kanaan phei hi chuan an veng chhunga May thla ration buhfai la zawng zawng an khul sak vek bakah Peniel pawhin BPL thenkhat leh AAY la zawng zawng an khul sak vek tih tarlan a ni. Hei bakah veng hrang hrangte hian tanpui ngai an awm thuta pek meitheih turin Buhfai leh chawhmeh an inralring tih an tarlang bawk.