No.575/2021-2022

Aizawl, the 19th May 2021: Vawiin khan Aizawl East-II biala Veng hrang hrangin Covid-19 avanga harsatna an tawh dan leh nasa zawka tan lak dan turte Pu Robert Romawia Royte, Sports Minister leh Bialtu MLA ni bawk hovin SAD Conference Hall-ah sawiho a ni.

Meeting kaihruaitu Sports Minister Pu Robert Romawia Royte chuan thuhmahruai neiin Aizawl East-II bialah Covid -19 hrivei tam mahse LLTF,Councillor tenen theihtawp an chhuah zel tur thusawiin a tih ngai chu theihtawp chhuaha tihzel an tum thu a sawi a. Sorkar Deptt hrang hrangten Aizawl East-II bial an ngaihsak danah lawmthu a sawi a ni.

He meeting ah hian Aizawl East-II Bial chhunga Councillor 2 -Pi B.Lalawmpuii,AMC Executive Councillor leh Pi Christina Roluahpuii Sailo Ward No 8 Councillor te bakah Deptt hrang hrang aiawhte leh Veng hrang hrang LLTF Chairman te an tel a ni.

Aizawl East-II bial hi Mizoram MLA biala Covid vei tamna te zinga mi niin tunah hian Active case 392 lai an nei mek a.

Bialtu Minister kaihhruai meeting-ah hian official lam pawhin Aizawl East bial chhung report pein 4C awm mekte leh Tuithiang leh Saron Venga 4C din belh chungchangte an sawi a. He hunah hian Sorkar leh Kohhran thawhho thatzia leh covid hripui nasa taka a len avangin tanho vek hunlai a nih thu te pawh sawi a ni.

Veng 7 atanga LLTF Chairman kalkhawmten an veng theuh report an pe a,rawtna chi hrang hrang an neihte chu Bialtu MLA,Ward No 9 Bialtu Executive Councillor leh Ward No 8 Councillor te bakah Deptt Officers ten a theih dan danin an bawhzui dawn a ni. Aizawl East-II ah hian Sorkar pawmpui CCCC 4 a awm mek a, pakhat dang dinbelh tum mek a ni bawk.