No.574/2021-2022

Aizawl, the 19th May 2021: Nimin(Dt 18.05.2021) chawhnu Dar 2:30 khan Naupang Chawchhun(Mid-day Meal)pek chungchanga India rama thuneitu sang, Programme Approval Board chu Pi Anita Karwal, Secretary, Ministry of Education, Govt. of India kaihhruaiin Online hmanga meeting neih a ni a. Mizoram atangin Dr.Lalzirmawia Chhangte IAS, Special Secretary, School Education Department bakah Pu James Lalrinchhana MCS, Director, School Education leh Officer dangte an tel a ni.

He meeting-ah hian kum 2021-2022 chhunga sum mamawh tur leh Buhfai mamawh zat turte chhawpchhuah a ni a. Sawrkar enkawl School-a inziaklut Primary School naupang 91,859 leh Middle School naupang 41,949 naupangte chuan kum 2021-2022 chhungin a thlawnin Mid-Day Meal an dawng leh thei dawn a ni. Sum mamawh chhawpchhuah cheng nuai 2161.37 chu pawm a ni a, Buhfai quintal 32,215 pawh naupangte Chawchhun atan pawm a ni bawk.

Kum2020-21 chhung khan hripui avanga school khar a ni chung pawhin naupang 1,34,778 hnenah a thlawnin buhfai leh chawhmehte sem reng a ni a, hei hi kalpui zel tur a ni.

Kum 2021-22 atang hian Mamit District huamchhungah buhfai tha mi (Fortified Rice) chu Sawrkar Schoola inziaklut naupangte hnenah Mid-Day Meal Scheme kaltlanga sem a ni dawn a, reilote-ah hei hi a taka kalpui tum a ni.