Vawiin khan Kolasib DC Conference hall ah kum 2018-19 chhung atan a Chief Minister’s Rural Housing Scheme hnuaia hamthatna dawng thei tur thlanchhuah te District Level Selection Committee ten ennawnna hun an nei.

Vawiin Kolasib District CM Rural Housing Scheme Selection Committee thutkhawm hi Pi Sangchhin Chinzah in a kaihruai a, he scheme kaltlanga hamthatna dawng tur thlanchhuah tum 2-na a nih thu sawiin, Block level a uluk tak a thlan a nih hnuah Project Director in a endik leh a, chumi hnuah chuan District Level Selection Committee te hian pawm tlak a nih leh nih loh an zirchian leh thin thu a sawi a ni.

CM Rural Housing Scheme hi Assam type in leh a aia dinhmun hniam (Kutcha House) nei thawmthat ngai te tanpuina tur a ruahman a ni a, dilna hi application form leh in leh lo dinhmun thlalak thil tel a thehluh a ni a, heng te hi zirchian a nih hnu ah a dawngtu tur te thlanchhuah an ni. Tun tum thutkhawm ah hian Thingdawl RD Block hnuaia dilna lut 29 leh Bilkhawthlir RD block atanga mi 71 te dilna chu Committee hian a pawmsak a ni.

Thutkhawm ah hian Tuirial A/C bialtu MLA Pu Andrew H.Thangliana bakah CM Rural Housing Scheme District Level Selection Committee ina a huam Thingdawl leh Bilkhawthlir RD Block hnuaia VCP hrang hrang, Sawrkar Official leh NGO aiawh te an kalkhawm a ni.

Attachment

  • Loading attachment...