No.4602/2020-2021

Aizawl, the 31^st August 2020 : Vawiin khan Mizoram Legislative Assembly MLA 35, Chief Minister Pu Zoramthanga, Speaker Pu Lalrinliana Sailo leh Minister dangte te tiamin, Assembly Secretariat-ah Rapid Antigen Test (RAT) hmangin COVID-19 an vei leh vei loh endik an ni a, an vaiin an negative vek a ni. Tunhnai khan MLA dang 5 te chu test an lo ni tawh bawk a, anni pawh an negative vek a ni.

Naktuk atangin ni 3 awh tur Assembly Session neih a ni dawn a. Health Department chuan he session chhung atan hian Nodal Officer Aizawl Civil Hospital Deputy Medical Superintendent Dr. John Zohmingthanga ruat a ni a. Amah leh a thawhpui ten vawiin hian Assembly Secretariat-ah sample lak leh endik hna an buaipui a ni.  India Danpuiin a phut angin Session hi neih loh theih loh a ni a. Hripui leng karah Assembly thutkhawm hi koh a tul tak avangin fimkhur thilah MLA zawng zawngte COVID-19 test paltlang tir an ni a. Vanneihthlak takin, MLA zingah tumah COVID-19 vei an awm lo tih finfiah a ni. 

Session neih chhunga zawm tur inkaihhruaina (SOP) chu Assembly Secretariat hian a lo tichhuak tawh a. He SOP hi MLA te bakah Assembly compound chhunga lut tur official zawng zawngte hnenah semchhuah a nih bakah TV leh chanchinbu kaltlangin puanzar a lo ni tawh bawk. Assembly muanawm, hrisel leh hlawhtling neih a nih theihna turin nasa takin inbuatsaihna a kal mek a ni.