No.4601/2020-2021

Mamit 31st August, 2020 : Vawiin khan DC Conference Hall, Mamit-ah African Swine Fever (ASF) chungchang ngaihtuahin District Level Co-ordination Committee chu an Chairman Dr. Lalrozama, IAS, Mamit District Bawrhsap hovin thutkhawm a ni.

Meeting-ah hian Dr. R.L Tanpuii, District AH&Vety Officer, Mamit chuan African Swine Fever chungchang sawifiahin ASF chu 100% Mortality a ni a. Vawk mai bakah Sanghal thlengin an kai theih thu sawiin a damdawi leh Vaccine a la awm loh avangin a hlauhawm em em a ni a ti. A natna lan chhuah dan chu kawthalo leh khawsik sang tak nena inkawpin Vawkte'n an thihpui thin thu a sawi.

Meeting-ah hian African Swine Fever chungchanga hriat tur pawimawh leh he hri laka mipuite inven dan tur a hnuaia mi ang hian tarlan a ni.

1. Hmun dang/ram dang atanga vawk lak luh loh tur.

2. Vawk note lak thar chu in hrangah kar 4 chhung tal dah hran a, natna a neih leh neih loh thlithlai reng tur.

3. Vawk chaw pek tur uluk taka chhum hmin vek tur. Chaw ningnawi pe te'n uluk taka chhuan that leh tur.

4. Kan Vawk vulhte regular takin rulhuthlo, Minerals leh Vitamins pek thin tur.

5. Kan ran in te pawnlam mi tlawhtir loh tur.

6. Vawk in chu nitin Tuisen (3:10000) emaw Chinai tui (1%) in tihfai thin tur.

7. Ran enkawltuin ran in-a thawmhnaw hak bik neih tur.

8. Vawk vulh laite an awmna sawn kual fo loh tur.

9. Vawk chu a inah khung reng tur a ni a, midang vawk, Sanghal leh ran dangte nen tlat pawlhtir loh tur.

10. Ran damlo reng reng a dahna bik siam a, an dam loh chhung chu dah hran tur.

11. Ran damlo chaw pekna hmanrua reng reng, a damlai chaw pek nan hman loh tur.

12. Ran damlo reng reng talh emaw hralh chhuah loh tur.

13. Vawk talhna leh puahna ningnawite felfai taka phum bo tur.

14. Vawk thi reng reng paih mai lovin thuk takah chinai nen phum tur a ni.

15. Kan ran in te fai taka enkawl a, ran ek leh zunte then thianghlim ziah tur.

Vawiin thutkhawmah hian African Swine Fever dona atan Rapid Response Team din tawh anih thu tarlan a ni a. He hri laka inven dan tur leh hriat tur pawimawhte Newspaper leh YMA information kaltlanga a tam thei ang ber puanzar nise tih a ni. Sa talh thinte pawh pawnlama mi la lut lova, Sa thianghlim leh hriatchian ngei talh thin tura chah an ni a. BSF leh Police ramri venga duty-te chu ASF laka kan him theih nana uluk taka duty turin chah an nih bakah Forest duty-te pawh ramvak, Sanghal kap awm palh thei veng tha turin chah an ni bawk.

Vawiin Meeting-ah hian venhimna lama thawktute SP, 4th IR leh BSF Commandant aiawhte, DTO Mamit, Sub Hqrs. YMA President, District Organiser, DM&R bakah District AH&Vety Office-a thawktute an tel a ni.