Chief Minister Pu Lal Thanhawla chuan ni li (4) chhung awh tur Chief Minister's Invitation Badminton Tournament, Serchhip District Badminton Association (SIDBI) buatsaih chu vawiin khan Serchhip Indoor Stadium-ah a hawng.
Chief Minister chuan thalaite tan khawvel thar siam turin sawrkarin kawng hrang hrangah hma la in, zirna lamah kalphung tha neih leh tihchangtlun te, eizawnna ngelnghet leh hlawk zawk siam tura Entrepeneurship tihhmasawn kawngah te leh infiamna lamah pawh hmunhma tha leh changtlung tak tak siam tawh a, siam mek zel a nih thu te a tarlang a. Hmunhma tha siam mai bakah thawhhona te siamin, Badminton ah pawh TATA Trusts nen tangkawpa Grassroot Badminton kalpui mek a nih thu te a tarlang a. Heng hmalaknate hi hlawhtling tak tak tur chuan hmang tangkaitu an awm a tul a ni, tiin Chief Minister chuan thalaiten an vanneihna hria a, facility tha an neih te hmang tangkai turin a fuih a. Chutihrual chuan chhunglam nun uluk a, ei leh in a fimkhur leh nun zemawi leh rilru put hmang dik tak vawng reng turin a chah bawk a. Vawiina hawn tak Tournament-a player te chuan tun intihsiakna mai piah lamah an hma hun zela hlawhtlinna an chan theih nan taima taka bei zel turin Chief Minister chuan a chah bawk a ni.
CM's Invitation Badminton Tournament hi vawiin ni 17 atanga ni 20 April, 2018 thleng khelh a ni dawn a. He tournament-a tel tur hian player 143 inziaklut in, Category 19 a then a ni a, Prize Money hi a zavai belhkhawmin Rs. 2,40,000 a ni. Tournament hawnna inkhawm hi Pu John Zorammawia, President, SIDBA chuan kaihhruaiin, Pu C. VL Hruaia, Sr. Vice President chuan lawmthu sawiin hun a khar a ni. Serchhip District Badminton Association hnuaiah hian Affiliated Club 13 an awm a ni.
Attachment
- Loading attachment...
