No.7927/2020-2021

Aizawl, 25th March, 2021 : Vawiin khan Co-operation Minister Pu C.Lalrinsanga chuan Mizoram State Co-operative Union (MSCU) Office leh Training Centre building thar, Bara Bazar, Dawrpui-a mi chu a hawng. Building thar hawnna inkhawm MSCU Prsident Pu K.Lalchamreia kaihhruaiah hian Co-operation Department Special Secretary Dr.Lalzirmawia Chhangte, Registrar of Co-operative Societies Pu Lalrinsanga, MSCU Board Member-te leh office staff-te, Dawrpui Local Council aiawhte leh mi sawm bik engemawzat an tel.

Khuallian Co-operation Minister Pu C.Lalrinsanga chuan MSCU-in Office & Training Centre building thar changtlung tak an neih lawmpuina thu sawiin intlansiakna tur atana thuam mamawhte inbel a, bultan ang chauh an nih tih hre renga, tan la sauh sauh turin a fuih. Mizoram Co-operative Union dintu leh hmahruaitu la damten an hmalak dan leh an tawnhriat thil chhinchhiah tlak tak takte chu ziaka dah a, thangtharte chhiar theih turin Archive-a dah tha turin a chah a. Cooperation Union hnuaia Federation hrang hrang awmte’n an hnuaia Primary Society tenau zawkte ngaihsak, dawm kan leh an mamawhte phuhruk thiam a pawimawh thu sawiin Minister chuan Mizoram-ah Co-operative a thang chak phawt chuan ram sum leh pai dinhmun a vawrh sang thei hle dawn a ni a ti. Nikum Covid-19 a hluar zuallai leh mipuite pawn chhuah khap ngai khawpa sorkarin lockdown a puan laite pawh khan Mizo khawtlang nunah inngaihsak leh inpuihtawnna chhawm nun reng a nih avangin Mizoram chu vawiin thlengin rampumah Covid hri kai leh Covid vanga boral hniam berna state a ni reng a, hei hi ‘cooperative movement’ dik tak a ni tiin Minister chuan hun lo kal zel turah pawh Co-operative hmasawnna zel tur hi mitin mawhphurhna a ni a ti. MSCU hnuaia Federation mamawh tur sum chu sorkar laipuiin NABARD kaltlangin ruahmanna fel tak a rawn siam zel dawn a, hei bakah Article 275 leh PMJVK hnuaiah pawh sum hmuh belh theih a beiseiawm a ni a ti bawk. Vawiina MSCU Office leh Training Centre Building thar hawn tak chu Mizoram-ah Co-operators tha tak tak chherchhuah nan hmang tangkai turin Khuallian chuan duhsakna a hlan a ni.

Khualzahawm Co-operation Special Secretary Dr.Lalzirmawia Chhangte, I.A.S., pawhin thu sawiin MSCU chu Co-operative education leh training lamah mipuite zirtir leh kaihruaina kawngah nasa zawka tan la turin a fuih a. Co-operative Movement chu Mizote nunze mil tak ni si, a huhova hnathawk nuam ti em em Mizote zingah beisei angin hma a sawn chak theih loh hi zir tham nia a hriat thu leh mithiamte’n a chhan chhui a, Mizoram-a Cooperative Movement thanmawhbawkte zirchhuak turin chona a siam bawk.  

Vawiin MSCU Office building hawnna inkhawmah hian MSCU bultantu leh Chairman hmasa ber, kum 10 lai Chairman-a tang, Pu Lalbiakthanga Pachuau hnenah chawimawina hlan a ni a.  MSCU CEO ni lai mek Pi Lalnuntluangi Hrahsel hnenah Cooperation Department tana a hnathawh that avangin chawimawina hlan a ni bawk.

Mizoram State Cooperative Union (MSCU) hi ni 29.3.1975 khan Regn. No.B.1/74-75 hmanga din a ni a. Kum 46 chhung Assam Type building office atan hman a nih hnuah kum 2018-2019 khan NEDP atangin cheng nuai 150 hmuh a ni a, 2019-2020-ah SEDP atangin cheng nuai 200 hmuh leh niin vawiina hawn tak MSCU building thar chu cheng nuai 350 sengin sak zawh a ni ta a ni. He building hi chhawng 6-a sang a ni a. Nodal Agency-ah MSCU niin Implementing Agency-ah F.K.Construction, Tuikual South hman a ni.

MSCU hi Board of Directors enkawlna hnuaia awm niin, a dinchhan ber leh a tum ber chu Mizoram chhunga Cooperative Society-te hnena zirtirna - education & training - pek a ni a, a dinchhan ang ngei hian zirtirna hi a kalpui reng a ni. MSCU hian Printing Press neiin thlakip chhuak chanchinbu ‘Cooperative Tlangau’ a ti chhuak thin a. Heng bakah hian pawnlam atanga work order a hmuh ang angte a thawk thin bawk.