No.7926/2020-2021

25.3.2021: Chief Minister Pu Zoramthanga chuan vawiin khan Champhai South bial chhunga sawrkar hmalakna hrang hrang leh hmachhawp te a hmunah tlawhin a enfiah. Chief Minister hi Zokhawthar, Melbuk, Zotlang, Ruantlang, Tlangsam leh a dangah kalin, Champhai South bialtu Law & Judicial Minister Pu TJ Lalnuntluanga leh Champhai North bialtu Dr. ZR Thiamsanga, Health & Family Welfare Board Vice-Chairman ni bawk te’n an tawiawm a ni.

Chief Minister hi zingkar atanga chhuakin, UD&PA Department kaltlanga lirthei lian dahna tur Zotlang Truck Terminal, a dung metre 120 leh a vang metre 75 vela lian tur siam mekte, World Bank road kawng laih mek te, Indo-Myanmar Border Trade Township Melbuk khuaa Trade & Commerce hmunhmate leh Zokhawthar Land Custom Station-te a tlawh hnuah amah lawmna hun Zokhawthar VC te buatsaih a hmanpui a. Nikuma lirnghingin a tihchhiat Police Station leh Middle School building te en bawkin, Zokhawthar khelmual changtlung zawka siam tura khawtlang hruaitute ruahman chu a enpui bawk.

Zokhawthar Land Customs Station tihchangtlun leh tihlenna (upgrade) tura ruahmanna chu a hmunah enin, helai hmunah hian administrative building leh warehouse bakah cold storage, truck terminal, immigration check point, animal leh plant quarantine laboratory leh thil dang dang pawimawh tak tak siam tura an ruahman a ni a.

Zokhawthara amah an lawmna pual inkhawm tawiah Chief Minister chuan COVID-19 hrileng avangin loh theih loha hmasawnna hma  chawlh hnuah hri danna damdawi te sem tan niin, zawi zawiin sawrkarin hma a lak chhoh thu sawiin, ruahmanna hrang hrang te chu a remchan dan ang zela tihhlawhtlin tum a nih tur thu a sawi a ni.

Hemi hnu hian Champhaiah let lehin kum 1990 chho bawr vel atanga lei che tan tawh, kum 2000, 2013 leh 2019 kuma che nasa zuala chhinchhiah Ruantlang Lersia Field bul lei chein a nghawng leh hmalak tawh dante a enfiah a. DIET Champhai tlawh lehin, Chief Minister chuan thawktute nena inkawmna hun a nei bawk a. Zirtirtu indaihlohna thu lo thlenin, DIET faculty danga attach leh faculty post 5 transfer chu laklet an duh thu leh Hindi zirtirtu an neih loh avanga hmalakpui tura an dilna chu lo ngaihtuah zui a nih tur thu a sawi a ni.

Hemi hnuah Master Plan Champhai hnuaia Ring Road buatsaih mek, Zotlang atanga Tlangsam pawhtu kawng kilometre 4.5-a thui cheithat mek leh Women Polytechnic Building, Tlangsamte a tlawh a. Hnahlan tlangdung khua te’n awlsam zawka Champhai an luh chhuah theihna tur  Vengthar to Zote Tuipui kai kawng, kilometer 1.6-a thui,  MLA fund hmanga laih zauh mek a enfiah hnuah Non-Lapsable Central Pool of Resources (NLCPR) sum cheng vaibelchhe 19.88 hmanga Champhai Keilungliah Lui khuaha Dam Reservoir leh Recreation Centre siamna tur chu tlawhin hmalak tawh chin leh hmachhawpte a enfiah a ni.

Chief Minister hian Champhai khawchhunga DFO office hmun leh Vengthlanga (Champhai North huam chin) Darphunga Memorial Car Parking siamna tura an ruahman chu a enfiah bawk.

Vawiin hian Commerce & Industries hotute, Champhai DC, SP leh district hotu dangte, PWD leh Home Department hotute’n Chief Minister hi an tawiawm bawk a ni.